बेलायतमा १९ मार्चमा पहिलोपटक पुष्टि भएको कोभिड– १९ को ‘एक्स ई’ भेरियन्ट संक्रमित भारतमा पनि देखिन थालेपछि नेपालमा समेत जोखिम बढेको छ । यसअघि फैलिएको ओमिक्रोनकै नयाँ भेरियन्ट ‘एक्स ई’ शनिबार गुजरातमा एक व्यक्तिमा देखिएको हो ।
गत बिहीबार नै महाराष्ट्रमा दक्षिण अफ्रिका यात्रा गरेर फर्किएकी ५० वर्षीया महिलामा उक्त भेरियन्ट देखिए पनि पुष्टि गरिएको थिएन । महाराष्ट्रमा नयाँ भेरियन्ट फेला परेको भनिएको केही घन्टामै भारतको स्वास्थ्य मन्त्रालयले संक्रमणबारे पूर्ण विवरण उपलब्ध नभएको जानकारी दिएको थियो । उक्त केसमा ‘फास्ट क्यु’मार्फत जिनोमबारे अध्ययन गर्दा नयाँ भेरियन्ट पुष्टि नभएको जनाएको मन्त्रालयले शनिबार गुजरातको केसमा भने पुष्टि गरेको छ । विश्व स्वास्थ्य संगठनको पछिल्लो विवरणअनुसार बेलायतमा मात्र ६ सय व्यक्तिमा ‘एक्स ई’ भेरियन्ट पुष्टि भइसकेको छ । ओमिक्रोन अर्थात् बिए–१ र बिए–२ को तुलनामा १० गुणा बढी संक्रामक मानिएको उक्त भेरियन्टले बेलायतमा पछिल्लो साता देखिएका नयाँ संक्रमितको ८६ प्रतिशत हिस्सा ओगटेको अनुमान गरिएको छ ।
तीव्र फैलिएपछि यसबारे अध्ययन पनि थालिएको छ । विश्व स्वास्थ्य संगठनले नयाँ भेरियन्टको थप अध्ययन र महŒवपूर्ण भिन्नताहरू पहिचान नभएसम्म ओमिक्रोनकै सबभेरियन्टका रूपमा लिइने स्पष्ट पारेको छ ।
बेलायतमा बढ्यो अस्पताल भर्नादर
एक्स ई भेरियन्ट पुष्टिसँगै बेलायतमा अस्पताल भर्नादर गत महिनाको तुलनामा दोब्बरले बढेको छ । बेलायतमा यो साताको औसत संक्रमणदर ६६ हजारभन्दा बढी देखिएको छ । शुक्रबार मात्रै बेलायतमा ४१ हजार चार सय ६९ जनामा संक्रमण पुष्टि भएको थियो । ओमिक्रोन मत्थर भएसँगै सामान्य अवस्थामा फर्किएको बेलायतमा पुनः संक्रमण बढेपछि विद्यालय र सार्वजनिक स्थानमा कडाइ थालिएको छ । तर, संक्रमण तीव्र फैलिनुमा एक्स ई मात्र नभई ओमिक्रोन पनि जिम्मेवार रहेको भाइरोलोजिस्टहरूले बताएका छन् । दक्षिण कोरिया, फ्रान्स, जर्मनी, भियतनाम, इटाली, अस्ट्रेलिया र चीनमा पनि संक्रमणदर बढ्दै गइरहेको छ ।
नेपालमा संक्रमणदर ०.३१ प्रतिशत
नेपालमा दैनिक संक्रमण लगभग शून्यमा झरेको छ । स्वास्थ्य तथा जनसंख्या मन्त्रालयका अनुसार शनिबार देशभर १३ जनामा मात्र संक्रमण पुष्टि भएको हो । परीक्षण गरिएका नमुनाका आधारमा संक्रमणदर ०.३१ प्रतिशतमा झरेको छ ।
हाल देशभर सक्रिय संक्रमितको संख्यासमेत घटेर ६ सय ३७ छ । लक्षित वयस्क उमेर समूहमा कोभिड विरुद्धको पूर्ण खोप ८२.८ प्रतिशत र बालबालितमा ७४ प्रतिशतले लगाइसकेका छन् ।
