बागमती प्रदेश सरकारले स्नातक उत्तीर्ण इन्जिनियर निजामती सेवामा प्रवेश गर्दा सातौँ तह कायम गर्ने व्यवस्था गरेको छ । प्रदेश लोकसेवाबाट जारी विज्ञापनमा छैठौँ तहमा आह्वान भएको भन्दै इन्जिनियरहरूले मुख्यमन्त्री राजेन्दप्रसाद पाण्डेको ध्यानाकर्षण गराएका थिए । नेपाल इन्जिनियर्स एसोसिएसन बागमती प्रदेश समितिले मुख्यमन्त्रीलाई १० माघमा इन्जिनियरिङ विषयमा उत्तीर्ण इन्जिनियरलाई सातौँ तहका लागि विज्ञापन आह्वान गर्न माग गरेको थियो । प्रदेश लोकसेवा आयोगले छैठौँ तहका लागि विज्ञापन खुलाएको भन्दै एसोसिएसनले विरोधसमेत जनाएको थियो ।
प्रदेशको आन्तारिक मामिला तथा कानुन मन्त्रालयले तयार गरिरहेको विधेयकको मस्यौदामा इन्जिनियरिङ क्षेत्रका विभिन्न संगठनले उठाउँदै आएका माग प्रदेश सरकारले सम्बोधन गरेको हो । मुख्यमन्त्री तथा मन्त्रिपरिषद्को कार्यालयले दिएको जानकारीअनुसार मुख्यमन्त्री पाण्डेले प्रदेश लोकसेवा आयोगसँग परामर्श गरेपश्चात् प्रदेश निजामती सेवा विधेयकमा सातौँ तह कायम गर्ने व्यवस्था गर्न निर्देशन दिएका हुन् । लोकसेवाबाट १० माघमा प्रकाशित विज्ञापन रद्द गर्ने वा नगर्ने भन्ने विषयमा आयोगका सबै पदाधिकारीहरू र मुख्यमन्त्री पाण्डेबीच भएको छलफलबाट सातौँ तह कायम गर्ने सहमति भएको थियो । विज्ञापन रद्द गर्दा ३५ वर्षे उमेर हदको कारण योग्य र प्रतिभावान जनशक्तिको लागि ढोका बन्द हुने भएकोले प्रदेशले ऐन जारी गर्दा वा अध्यादेश ल्याउँदा तह समायोजन गर्नका लागि लोकसेवा आयोगका अध्यक्षले सुझाव दिएका थिए ।
आन्तरिक मामिला तथा कानुन मन्त्रालयका सचिव रुद्रसिं तामाङले मुख्यमन्त्रीको निर्देशनबमोजिम मस्यौदा तयार भइसकेको जानकारी दिए । मुख्यमन्त्रीको प्रमुख स्वकीय सचिव उमेश रुपाखेतीले संगठनहरूले निरन्तर आवाज उठाएपछि माग सम्बोधन गरिएको बताए ।
