लगातार उचाइ छोइरहँदा नेप्सेको बुलिस प्रवृत्ति कमजोर भइरहेको छ, तर लगानीकर्ता भने आक्रामक नै देखिएका छन । बजार एकै दिन कहिले १२ अंकसम्म र कहिले ३४ अंकसम्म घटेको छ । उच्च उतारचढाव देखिएको बजार बन्द हुँदा भने अघिल्लो दिनको भन्दा ३ दशमलव ३५ अंकले बढेर २ हजार दशमलव ४० अंकमा बजार बन्द भएको छ ।
बजार घटे पनि ७ अर्ब ४० करोड रुपैयाँको कारोबार भएको छ । अहिले लगानीकर्ता नयाँ उचाइमा पुग्दा पनि दरिलो भएर कारोबार गरिरहेका छन् । यद्यपि, बजार सानै भए पनि करेक्सन हुने सम्भावना भने बढेर गएको छ । बजार खरिददारीको उच्च चरणमा रहेको नेप्सेको आरएसआई सूचकले समेत देखाइरहेको छ । १४ दिने आरएसआई सूचकले यो ९९ दशमलव ३३ स्केलमा देखिएको छ ।
बजार बढे पनि मंगलबारकै कारोबार पनि बियरिस रहेको एड्भान्स–डिक्लाइन रेसियो (एडी रेसियो)ले संकेत गरेको छ । यो अनुपात शून्य दशमलव २९ छ । यो सूचक १ भन्दा माथि रहे बजार बुलिस र एकभन्दा तल रहे बजार बियरिस रहेको विश्लेषण गरिन्छ ।
बजारमा यस दिन कारोबार भएका विभिन्न संस्थाको १ सय ९७ किसिमका धितोपत्र, ऋणपत्र, सामूहिक लगानी कोषका इकाइमा १ सय ४१ वटाको मूल्य घटेको, ४१ वटाको मूल्य बढेको र १५ वटाको मूल्य स्थिर रहेको छ । विगत १४ दिनमा बजार १ दिन मात्र २ अंकले घटेको छ ।
बजारमा प्रतिफल सुनिश्चित गर्ने क्रममा समेत लगानीकर्ता लागेका छन् । यद्यपि, बजारको वृद्धि कायमै रहेको देखाउन बाठा लगानीकर्ताले नेपाल टेलिकमको मूल्यमा फेरि पनि लगानी बढाइरहेको देखिन्छ । नेपाल टेलिकमको मूल्य कारोबारको मध्यदेखि एकोहोरो बढेको छ ।
बजार पुँजीकरणका आधारमा ६ प्रतिशतभन्दा धेरै हिस्सा रहेको टेलिकमको मूल्य बजार बन्द हुँदा मूल्य करिब १० प्रतिशतसम्म बढेको छ । टेलिकम सूचीकृत ‘अन्य’का साथै उत्पादनमूलक समूहबाहेक सबै परिसूचक बजार खुलेको समयभन्दा तल नै रहेर बजार बन्द भएको छ ।
बजार बन्द हुँदा जलविद्युत्, उत्पादनमूलक, अन्य, लघुवित्त र जीवन बिमा समूहगत परिसूचक मात्र अघिल्लो दिनको भन्दा वृद्धि भएको छ । नेपाल पुनर्बिमा, अपर तामाकोसीलगायतका ठूला पुँजीका कम्पनीको मूल्य पनि करिब १० प्रतिशतसम्म बढेको छ । नेप्सेको मैनबत्ती चित्रले यस दिन ह्यामर आकृति बनाएको छ ।
सानो शरीरसहितको यस आकृतिको तल्लो धागो लामो छ । यसले धेरै लगानीकर्ता बजार घट्ने पक्षमा देखिन थालेको र बजारलाई तलतिरैबाट बढी दबाब परिरहेको संकेत गर्छ । यो संकेत मध्यम नै हो । आगामी कारोबार घटेर भएमा केही दिन बजार करेक्सनमै देखिनेछ ।
