साताभरमा १२ अर्ब २२ करोड रुपैयाँको सेयर किनबेच, दैनिक औसत कारोबार रकम भने १५ दशमलव १७ प्रतिशतले घट्यो
गत साताभरमा नेप्से परिसूचक १० अंकले मात्रै बढेको छ । नेप्सेको दिशा स्पष्ट नभइरहेकाले पनि नेप्सेमा ठूलो उतारचढाव देखिएको छैन । साताभरमा १२ अर्ब २२ करोड रुपैयाँको सेयर किनबेच भएको छ । दैनिक औसत कारोबार रकम भने अघिल्लो साताको तुलनामा घटेको छ । यस्तो रकम १५ दशमलव १७ प्रतिशतले घटेर २ अर्ब ४४ करोड रुपैयाँको सेयर किनबेच भएको हो ।
कारोबार रकमका आधारमा गत साता सबैभन्दा धेरै प्राइम कमर्सियल बैंकको सेयर किनबेच भएको हो । बैंकको ६६ करोड रुपैयाँको सेयर किनबेच भएको छ । किनबेच भएको सेयर संख्याका आधारमा भने यो बैंक दोस्रो स्थानमा छ । बैंकको १९ लाख १५ हजार कित्ता सेयर खरिद–बिक्री भएको हो ।
प्राइमको ५४ प्रतिशतले मुनाफा बढेर १ अर्ब १ करोड रुपैयाँ पुगेको हो । बैंकले हालसम्म ३३ करोड ८४ लाख प्रतिफलका रूपमा वितरण गर्न सक्छ । यो भनेको चुक्ता पुँजीको २ दशमलव ३६ प्रतिशत हो । सातामा बैंकिङ समूहगत परिसूचक भने ३९ अंकले घटेको छ । सबैभन्दा बढी संख्यामा सेयर कारोबार भने शिवश्री हाइड्रोपावरको रहेको छ । शिवश्रीको २७ लाख २६ हजार कित्ता सेयर खरिद–बिक्री भएको थियो ।
सातामा व्यापारमूलक, जलविद्युत् र लघुवित्त कम्पनीको समूहगत परिसूचक सबैभन्दा धेरैले बढेको छ । यी समूहमा क्रमशः १० दशमलव ९५ प्रतिशत, ३ दशमलव ६ र ३ दशमलव १७ प्रतिशतले वृद्धि भएको हो ।
सातामा २ करोड ११ लाख कित्ता सेयर थपिएको छ । हिमालयन जनरल इन्स्योरेन्स र तिनाउ मिसन डेभलपमेन्टको बोनस सेयर, गुराँस लाइफको हकप्रद र सानिमा जनरल इन्स्योरेन्स कम्पनीको प्राथमिक सेयर थपिएको हो ।
नेप्से परिसूचक अन्तरदिनको कारोबारमा ७ देखि १२ अंकले उतारचढाव भइरहेको छ । यसबीचमा नेप्से १ हजार ६ सय ३४ आसपासबाट फर्कने, तर १ हजार ६ सय ४६ आसपासबाट माथि जान नसक्ने गरिरहेको छ । नेप्से सानो रेन्जमा रहेर तल–माथि मात्र गरिरहेको छ ।
नेप्से १४ दिने आरएसआई सूचकका आधारमा अधिक खरिद क्षेत्रमा थप उक्लिएको छ । बुधबार ७३ स्केलमा रहेको नेप्से ७६ मा पुगेको हो । रेखाचित्रका आधारमा नेप्सेले डबल बटम आकृति बनाउन लागेको देखिन्छ । हालको बिन्दुबाट माथि उक्लिए यस्तो आकृति बन्नेछ र बजार थप केही बढ्न सक्ने विश्लेषण गरिन्छ ।
७ दिने रेखाले २१ दिने रेखालाई थप तल छाडेर माथि लागेकाले बजार केही बढ्न सक्ने देखिएको छ । नेप्सेको मैनबत्ती चित्रले भने बजारले स्पष्ट दिशा समात्न नसकेको संकेत गरिरहेको छ ।
