बाराका पत्रकार वीरन्द्र साहको हत्यामा संलग्न भनिएका अर्का एक व्यक्तिलाई प्रहरीले पक्राउ गरेको छ । कोल्हबी नगरपालिका– ४ स्थित सपहीबाट प्रहरीले हत्या आरोपी हरेराम पटेललाई बिहीबार पक्राउ गरेको हो ।
जिल्ला प्रहरी कार्यालय बाराका प्रमुख प्रहरी उपरीक्षक कृष्ण पँगेनीका अनुसार केही समयअघिदेखि कोल्हबी आसपासमा लुकिछिपी बस्दै आएको सूचनाका आधारमा खोज्दा उनी पक्राउ परेका हुन् । पत्रकार साहको हत्या भएको १३ वर्षपछि बारा प्रहरीले हत्यामा संलग्न भनिएका पाँचजनामध्ये चारजनालाई पक्राउ गरेको छ । पक्राउ परेका दुईजनालाई यसअघि नै अदालतबाट सर्वस्वसहित जन्मकैदको फैसला भइसकेको छ ।
गत २५ फागुनमा पक्राउ परेका कुन्दन फौजदारको हकमा समेत बारा प्रहरीले सर्वस्वसहित जन्मकैद माग दाबी गरी अदालत पेस गरेको छ । फौजदारको मुद्दा हाल मुल्तबीमा छ ।
बिहीबार पक्राउ परेका पटेललाई समेत सर्वस्वसहित जन्मकैदको माग दाबी गरी अदालत पेस गर्ने बारा प्रहरीले जनाएको छ । तत्कालीन माओवादीले १८ असोज ०६४ सालमा बाराका पत्रकार साहलाई अपहरण गरी हत्या गरी गाडेको अवस्थामा २२ कात्तिकमा टाँगिया बस्तीको जंगलमा शव फेला परेको थियो ।
