जापानको नागोया र आइचीमा हुने २०औँ एसियाली खेलकुदको ‘क्लोज क्याम्प’ सुरु भएको छ । यसअघि प्रशिक्षणमा मात्रै सीमित रहेका खेलाडी तथा प्रशिक्षकलाई सरकारले सिनामंगलस्थित रोयल बुटिक र गौशालास्थित पशुपति बुटिकमा ‘क्लोज क्याम्प’ राखेको हो । सरकारले चीनमा आयोजना भएको १९औँ एसियाली खेलकुद प्रतियोगिता सम्पन्न भएलगत्तै ‘मिसन २६’ सुरु गरेको थियो ।
तत्कालीन सदस्यसचिव टंकलाल घिसिङले विगतको भन्दा प्रभावकारी सहभागिता बनाउने उद्देश्यसहित पहिलो चरणको प्रशिक्षणमा पाँच खेल (तेक्वान्दो, बक्सिङ, जुडो, कराँते र उसु)लाई प्रशिक्षणमा समावेश गरेका थिए । त्यसपछि सरकारले विभिन्न समयमा विभिन्न खेलसंख्या बढाउँदै लगेको थियो । त्यसवेलादेखि नै खेलाडी आफ्नौ खर्च र व्यवस्थापनमा प्रशिक्षणमा आउने गरेका थिए । सरकारले प्रशिक्षणमा सहभागी खेलाडी तथा प्रशिक्षकलाई खुराक खर्चका रूपमा दैनिक तीन सय रुपैयाँ र आठ हजार रुपैयाँबराबरको किट्स सेट उपलब्ध गराउँदै आएको थियो ।
अब भने प्रतियोगिता सुरु हुन करिब ४१ दिन बाँकी रहँदा सरकारले होटेलमा सारेर प्रशिक्षण गराउन थालेको हो । २०औँ एसियाली खेलकुद ३ असोजबाट सुरु हुँदै छ । नेपालबाट २२ खेलमा ८० पुरुष र ५६ महिला गरी कुल एक सय ३६ खेलाडी प्रतियोगितामा सहभागी हुनेछन् । यद्यपि, छनोट भएर पनि सरकारको लापरबाहीका कारण स्पोर्टस् प्रतियोगितामा सहभागी हुन पाएनन् ।
यी हुन् ‘क्लोज क्याम्प’ रहेका खेल
सरकारले रोयलमा जुडो, उसु, महिला भलिबल, बक्सिङ, कराँतेको काता टोली, डान्स स्पोर्टस्, साइक्लिङ, गल्फ, एथलेटिक्स र आर्चरीका खेलाडी र प्रशिक्षकलाई राखेको छ । पशुपतिमा कराँतेको कुमुते टोली, तेक्वान्दो, सफ्ट टेनिस, टेनिस, पौडी, स्क्वास, ब्याडमिन्टन र टेबलटेनिस टोलीलाई व्यवस्थापन गरेको जनाएको छ । यी १५ खेलमध्ये उसु, साइक्लिङ, गल्फ, तेक्वान्दो, टेनिस, पौडी र टेबलटेनिसका केही खेलाडी वैदेशिक प्रशिक्षणमा छन् । त्यस्तै, स्केटबोर्ड, कुस्ती, क्यानोइङ र पुरुष–महिला कबड्डीका सबै खेलाडी वैदेशिक प्रशिक्षणमा रहेका छन् ।
बक्सिङ टोलीले भारतमा प्रशिक्षण गर्ने
बक्सिङले २०औँ एसियाली खेलकुदको तयारी भारतको आसामस्थित गुवाहटीमा गर्ने भएको छ । त्यसका लागि सात खेलाडीसहित नौ सदस्यीय नेपाली टोली सोमबार भारत जाँदै छ । एसियाली खेलकुदमा चार पुरुष र तीन महिलाले नेपालको चुनौती पेस गर्नेछन् ।
पुरुष ५५ केजीमुनि चन्द्रबहादुर थापा, ६० केजीमुनि खगेन्द्र रोकामगर, ७० केजीमुनि दानबहादुर दर्लामी र ९० केजीमुनि रविन नेपालले प्रतिस्पर्धा गर्नेछन् । महिला ५१ केजीमुनि रमिशा श्रेष्ठ, ५४ केजीमुनि अस्मिता तामाङ र ६५ केजीमुनि कुसुम तामाङ सहभागी हुनेछन् ।
खेलाडीले स्पोर्टस् अथोरिटी अफ इन्डिया (साई)अन्तर्गत नेसनल सेन्टर अफ एक्सिलेन्समा ४० दिन तयारी प्रशिक्षण गर्ने नेपाल बक्सिङ महासंघका सचिव पुष्करराज पन्तले जनाएका छन् । टोली त्यतैबाट जापान जानेछ । टोलीलाई नेपाल ओलम्पिक कमिटी र राखेपले फरक–फरक रूपमा बिदाइ गरेका छन् । रविनबाहेक सबैको पहिलो एसियाड सहभागिता हो । रविनले १९औँ एसियाली खेलकुदमा प्रतिस्पर्धा गरेका थिए । चन्द्र सन् २०२५ मा दुबईमा भएको आइबा विश्व पुरुष बक्सिङ च्याम्पियनसिपका ऐतिहासिक कांस्य पदक विजेता पनि हुन् । चन्द्रको कांस्य पदक नेपाली बक्सिङको इतिहासमा हालसम्मकै ठुलो हो ।
प्रशिक्षकमा राज श्रेष्ठ तथा दीपक महर्जन छन् । व्यवस्थापकमा नेपाल बक्सिङ महासंघका महासचिव मानबहादुर भण्डारी रहेका छन् । भण्डारी पछि भारत जानेछन् । एसियाली खेलकुदमा समग्रमा बक्सिङले तीन फरक संस्करणमा हालसम्म ६ कांस्य पदक जितेको छ ।
बक्सिङले दक्षिण कोरियाको सिओलमा सन् १९८६ मा भएको १०औँ संस्करणमा पहिलोपटक पदक जितेको थियो । त्यसवेला दलबहादुर रानामगर, तुलबहादुर थापा, सुशील पोखरेल र मनोजबहादुर श्रेष्ठले कांस्य पदक जितेका थिए । बाँकी दुई संस्करणमा बक्सिङले पदक जित्दै नेपाललाई पदकविहीन हुनबाट जोगाएको थियो ।
सन् १९९० मा चीनको बेइजिङमा भएको ११औँ संस्करणमा चित्रबहादुर गुरुङ तथा सन् २०१० मा चीनकै ग्वाङझाउमा भएको १६औँ एसियाडमा हालका टोलीका प्रशिक्षकमध्येका दीपकले नेपाललाई कांस्य पदक दिलाएका थिए । दक्षिण कोरियाको इन्चोनमा भएको १७औँ संस्करणदेखि बक्सिङ पदकविहीन छ ।
