मकाया सबैलाई थाहा भएकै नाम हो । जसको कथा फरक छ । सात दशकको अवधिमा ९१ वर्षीय अर्जेन्टिनी पत्रकार मकायाले १८औँपटक विश्वकपको समाचार संकलन गरिरहेका छन् । पत्रकारका लागि उनको यो जोस अभूतपूर्व छ । सन् १९५८ देखि उनले विश्वकपको रिपोर्टिङ निरन्तर रूपमा गर्दै आएका छन् । मकायाले खेलकुद रिपोर्टिङ सुरु गर्दा ब्राजिलका सर्वकालीन महान् खेलाडी पेले केवल १७ वर्षका थिए । मकाया भने २४ वर्षका थिए । अर्जेन्टिनाले उनलाई रिपोर्टिङ गर्न स्विडेन पठाइएको थियो ।
मकायाको पहिलो जिम्मेवारी थियो– अस्ट्रियाविरुद्ध ब्राजिलका पेलेको प्रदर्शनको तथ्यांकसहित रिपोर्ट तयार पार्ने । उनको विश्वकपको पहिलो रिपोर्टिङ खराब रह्यो । अर्जेन्टिना चेकोस्लोभाकियासँग ६–१ ले पराजित भयो । चेकोस्लोभाकियाविरुद्ध उनीहरूलाई कुनै जानकारी नै थिएन । उसले अर्जेन्टिनालाई स्तब्ध बनायो ।
पेलेदेखि मेसीसम्मका रिपोर्टिङ
सात दशक फुटबलका रिपोर्टिङ गरेका मकायाले फुटबलमा निकै परिवर्तन भएको पाएका छन् । उनले पेलेदेखि अर्जेन्टिनी डिएगो म्यारोडोनासँगै लियोनल मेसीसम्मका खेलाडीबारे समाचार संकलन गरेका छन् । उनका अनुसार अहिले टेलिभिजन डिजिटलमा परिवर्तन भएको छ ।
पेले र म्याराडोना उत्कृष्ट
विश्व फुटबलमा उत्कृष्ट खेलाडीको प्रश्न गर्दा मकाया कहिले अलमल गर्दैनन् । उनको विचारमा पेले र म्याराडोना नै सर्वकालीन फुटबलर हुन् । ‘सन् १९७० मा पेले र सन् १९८६ मा म्याराडोना उत्कृष्ट थिए । त्यो समय र अहिलेको खेल अनि खेल्ने खेल नै निकै फरक छ,’ उनले भने । विश्वकपको रिपोर्टिङ करिअरमा सन् १९८६ को संस्करण सबैभन्दा उत्कृष्टका रूपमा उनले लिने गरेका छन् ।
