जेन–जी आन्दोलनका क्रममा प्रदेश सभा भवनमा क्षति पुगेपछि लामो समयदेखि अवरुद्ध बागमती प्रदेश सभा बैठक मंगलबारदेखि पुनः सञ्चालन हुने भएको छ । हेटौँडा उपमहानगरपालिकापरिसरमा निर्माण गरिएको मुख्यमन्त्री सभाहलमा मंगलबार दिउँसो ४ बजे प्रदेश सभा बैठक बस्ने तय भएको हो ।
जेन–जी आन्दोलनका क्रममा प्रदेश सभा सचिवालयसहित सभाहल र प्रदेश सरकारका अन्य संरचना जलेपछि प्रदेश सभा बैठक प्रभावित भएको थियो । २७ साउनयता प्रदेश सभा बैठक त्यसयता बस्न सकेको थिएन ।
उपसभामुख अप्सरा चापागाईंका अनुसार क्षति पुगेको भवनको सामान्य मर्मत गरेर अस्थायी रूपमा बैठक सञ्चालन गर्न लागिएको हो । हाल सभामुख पद रिक्त रहेको अवस्थामा सभा सञ्चालन तथा सचिवालय व्यवस्थापनको जिम्मेवारी उपसभामुख चापागाईंको काँधमा छ ।
जेन–जी आन्दोलनपछि तत्कालीन सभामुख भुवनकुमार पाठकले पदबाट राजीनामा दिएका थिए । उनले १ असोजमा लिखित राजीनामा दिए पनि ४ मंसिरमा अधिवेशन अन्त्य भएपछि मात्र राजीनामा सार्वजनिक गरिएको थियो ।
