बेलायती सेनाका जागिरे धरानका कृष्ण राई परिवारका चार सदस्यसहित सोमबारदेखि पोखरामा बिदा मनाउन आएका छन् । भक्तपुरकी मनु प्रधान पाँच साथीहरूसँगै बुधबारदेखि पोखरामै छन् । त्यस्तै, भारतको उत्तर प्रदेश घर भएका श्रीकान्त परिवारका तीन सदस्य तथा अमेरिकाबाट आफ्नो प्रेमिकासँगै आएका माइक पनि बुधबारदेखि पोखरामै रमाइरहेका छन् । उनीहरूजस्तै हजारौँ आन्तरिक तथा बाह्य पर्यटकले पोखरा पूरै गुल्जार भएको छ ।
अधिकांश पर्यटक अंग्रेजी नयाँ वर्ष २०२६ मनाउनुका साथै घुम्न पोखरा आएका हुन् । यही अवसरमा पोखरामा ‘सडकमै खाऔँ, सडकमै नाँचौँ र सडकमै रमाऔँ’ भन्ने नारासहित फेवाताल किनारमा २७औँ संस्करणको पोखरा सडक महोत्सव २०२६ जारी छ । रेस्टुरेन्ट एन्ड बार एसोसिएसन नेपाल (रेवान) पोखराले आयोजना गरेको महोत्सव १७ पुससम्म चल्नेछ ।
अमेरिकाबाट प्रेमिकासँगै आएका माइक दुई वर्षअघि समेत पोखरा आएका थिए । नेपालका अन्य स्थानको तुलनामा पोखराआसपासको क्षेत्र मन परेकाले योपटक प्रेमिकालाई घुमाउन लिएर आएको उनले बताए । १९ गतेसम्म पोखरामै बस्ने र त्यसपछि सात दिन पोखराआसपासका क्षेत्र घुमेर चार दिन काडमाडांै बसेर फर्कने योजना रहेको उनले सुनाए ।
पोखरालाई अग्रेजी नयाँ वर्ष मनाउने गन्तव्यस्थलको रूपमा विकास गर्न रेवानले विगत २६ वर्षदेखि महोत्सव अयोजना गर्दै आएको अध्यक्ष विश्वराज पौडेलले बताए । फिस्टेल गेटदेखि जहरेवरसम्मको चार किलोमिटर सडकमा चार सयभन्दा बढी स्टल छन् ।
होटेलहरू भरिभराउ
नयाँ वर्ष मनाउन आन्तरिक एवं बाह्य पर्यटकका कारण पोखरा र आसपासका होटेल भरिभराउ भएका छन् । होटेल संघ पोखराका अध्यक्ष लक्ष्मण सुवेदीका अनुसार तीन दिनअघि पोखराका होटेलको अकुपेन्सी ६५ प्रतिशत रहेकोमा बुधबार साँझसम्म आइपुग्दा बढेर करिब ९५ प्रतिशत पुगेको छ । यस क्षेत्रका होटेलको बेड क्षमता करिब ४० हजारको हाराहारीमा छन् । हाल पोखराका होटेलहरूमा १५ हजारको हाराहारीमा विदेशी, १३ देखि १४ हजार भारतीय र करिब नौ हजार आन्तरिक पर्यटक रहेको उनले बताए । पोखरा र आसपासका क्षेत्रमा अहिले दुई लाख पर्यटक रहेको व्यवसायीहरू बताउँछन् ।
