प्रधानमन्त्री सुशीला कार्कीले नेपाल वायुसेवा निगमको ए–३२० जहाजको इजरायलमा रहेको इन्जिन छिटो ल्याएर सञ्चालन गर्न निर्देशन दिएकी छिन् । निगम सञ्चालक समिति र व्यवस्थापन अधिकारीहरूलाई सिंहदरबार बोलाएर प्रधानमन्त्री कार्कीले आफ्नो इन्जिन इजरायलमा थन्क्याउने र भाडाको इन्जिन चलाउने प्रवृत्तिमाथि प्रश्न गरिन् ।
यस्ता बेथिति सहेर बस्न नसकिने उनले स्पष्ट पारिन् । ‘सञ्चालक समितिले निर्णय गरेर हुन्छ वा व्यवस्थापन तहबाटै काम हुन्छ, जसरी हुन्छ नतिजा दिनुपर्छ,’ उनले भनिन्, ‘कुनै प्रक्रियागत बहाना नगरौँ । जनताको पैसा लगानी भएको संस्थालाई ग्राउन्डेड गर्ने अवस्था आउन दिनुहँुदैन ।’ उनले देश जनता र संस्थाको पक्षमा निर्णय गर्दा नडराउन पनि उनले आग्रह गरिन् । उनले भनिन्, ‘मुद्दा लाग्ला कि भनेर असल काम गर्न डराउनुहुँदैन, गलत काम गर्न मात्र डराउनुहोस् ।’
यसैबिच सरकारले नेपाल वायुसेवा निगमको महाप्रबन्धक खुला प्रतिस्पर्धाबाट नियुक्त गर्ने गरी प्रस्ताव आह्वान गरेको छ । संस्कृति, पर्यटन तथा नागरिक उड्ययन मन्त्रालयले बिहीबार सार्वजनिक सूचना जारी गर्दै इच्छुक व्यक्तिलाई प्रस्ताव पेस गर्न आह्वान गरेको हो ।
मन्त्रालयले यसमा विभिन्न मापदण्ड तथा योग्यता तोकेको छ । उम्मेदवार नेपाली नागरिक भएको हुनुपर्ने, ३० देखि ६५ वर्ष उमेर भएको र स्नातकोत्तर हासिल गरी नागरिक उड्ययन, पर्यटन व्यवस्थापन, अर्थशास्त्रसम्बन्धी क्षेत्रमा कम्तीमा १० वर्ष उच्चस्तरको व्यवस्थापकीय अनुभव भएको हुनुपर्नेछ ।
