अखिल नेपाल फुटबल संघ (एन्फा)ले सोमबार सहिद स्मारक ‘ए’ डिभिजन लिग आयोजनाका सम्बन्धमा १४ क्लबका प्रतिनिधिसँग छलफल गर्न बैठक बोलाएको छ । एन्फाले सातदोबाटोस्थित एन्फा मुख्यालयमा दिउँसो २ बजे बस्ने बैठकमा क्लबका पदाधिकारीलाई अनिवार्य उपस्थित हुन भनेको छ । गत शुक्रबार नवनियुक्त खेलकुदमन्त्री बब्लु गुप्ताले फुटबलको पछिल्लो अवस्थाबारे चासो राख्दै ‘ए’ डिभिजन लिग नहुनुको कारण एन्फा महासचिव किरण राईलाई सोधेका थिए ।
मन्त्री गुप्ताले सिंहदरबारस्थित मन्त्रालयमै एन्फा र शीर्ष डिभिजन क्लबसँग छुट्टाछुट्टै बैठक गरेका थिए । मन्त्रीसँगको बैठकपछि एन्फा महासचिव राईले ‘ए’ डिभिजन लिगमा आबद्ध १४ क्लबका पदाधिकारीसँग छलफल गर्ने बताए । राईले ५० दिनभित्र शीर्ष डिभिजन लिग सुरु गर्ने विषयमा छलफल भएको मन्त्रीलाई जानकारी गराएका थिए ।
एन्फाले आगामी वर्षको २६ असारसम्म सहिद स्मारक ‘ए’ डिभिजन लिग आयोजनाको प्रस्ताव राखेको थियो । त्यसपछि २६ असोजमा एन्फाले क्लबहरूलाई राष्ट्रिय लिगको प्रस्ताव राख्यो । एन्फाको पछिल्लो बैठकले तयारी नपुगेका कारण ‘ए’ डिभिजन लिग गर्न नसकिने र राष्ट्रिय लिगको प्रस्ताव राखेको हो । एन्फाले तीन सातापछि पुनः बैठक बोलाएको हो । एन्फाको गत २६ वैशाखमा काभ्रेको धुलिखेलमा भएको वार्षिक साधारणसभामामा ‘ए’ डिभिजन लिग १ पुस देखि ०८३ जेठ ३१ सम्म हुने गरी क्यालेन्डर सार्वजनिक गरेको थियो ।
मुख्य प्रशिक्षक खड्काको प्रारम्भिक लिस्टमा ३५ खेलाडी
राष्ट्रिय फुटबल टोलीका मुख्य प्रशिक्षक हरि खड्काले मलेसिया र बंगलादेशविरुद्धको खेलका लागि प्रारम्भिक टोलीमा ३५ खेलाडी समावेश गरेका छन् । खड्काले बंगलादेशविरुद्धको मैत्रीपूर्ण खेल र एएएफसी एसियन कप छनोट खेल्न आइतबार प्रारम्भिक टोली घोषणा गरेका हुन् ।
गत बुधबार मुख्य प्रशिक्षक म्याट रोसले पदबाट राजीनामा दिएपछि एन्फाले १४ कात्तिकमा खड्कालाई मुख्य प्रशिक्षकको जिम्मेवारी दिएको थियो । राष्ट्रिय टोलीका पूर्वकप्तान तथा स्ट्राइकर खड्काको पहिलो प्रशिक्षणमा नेपालले २७ कात्तिकमा बंगलादेशविरुद्ध फिफा विन्डोमा अन्तर्राष्ट्रिय खेल खेल्नेछ । यस दिन बंगलादेशले अफगानिस्तानसँग खेल्ने तय थियो । तर, अफगानिस्तानले भ्रमण रद्द गरेपछि बंगलादेशले नेपालसँग प्रतिस्पर्धा गर्न लागेको हो । त्यसपछि नेपालले एएफसी एसियन कप छनोटअन्तर्गत २ मंसिरमा मलेसियासँग प्रतिस्पर्धा गर्नेछ ।
