जिल्ला प्रहरी कार्यालय ताप्लेजुङका २० जना प्रहरी कर्मचारी पुरस्कृत भएका छन् । जिल्ला प्रहरी प्रमुख डिएसपी रवि रावललगायत २० जना प्रहरी कर्मचारीलाई प्रहरी कार्यालयको निरीक्षण भ्रमणका लागि आएका कोशी प्रदेश प्रहरी प्रमुख (डिआइजी) राजन अधिकारीले पुरस्कृत गरेका हुन् ।
जिल्ला प्रहरी कार्यालय ताप्लेजुङको निरीक्षण तथा अनुगमनसँगै उत्कृष्ट कार्य गर्ने प्रहरी तथा कर्मचारीलाई डिआजी अधिकारीले पुरस्कृत गरेको जिल्ला प्रहरी कार्यालय ताप्लेजुङका प्रवक्ता तथा सूचना अधिकारी प्रहरी निरीक्षक विवेक बस्नेतले बताए ।
पाथीभरा केबलकार विवाद, झडपजस्ता गतिविधि भइरहेका वेला प्रदेश प्रहरी प्रमुखले जिल्लामै आएर गरेको सम्मान र पुरस्कारलाई महत्त्वका साथ हेरिएको छ । हिरासत, कार्यालय भवन, शाखाहरू अवलोकनपछि प्रहरी कर्मचारीलाई डिआइजी अधिकारीले निर्देशन दिएका थिए ।
आचरण र व्यवहारमा सुधार ल्याई भाइचारा तथा सहयोगी भावनाको साथ आफ्नो कर्तव्य निर्वाह गर्न उनले निर्देशन दिएका छन् । डिआइजी अधिकारीले जिल्ला प्रहरी कार्यालय ताप्लेजुङको निरीक्षणसमेत गर्दै कार्यरत प्रहरी कर्मचारीलाई आवश्यक निर्देशनसमेत दिएको बताइएको छ ।
