फेब्रुअरी २०२२ मा रुसले युक्रेनमाथि आक्रमण सुरु गरेयता करिब ४३ हजार युक्रेनी सैनिक युद्ध मैदानमा मारिएका भोलोदिमिर जेलेन्स्कीले बताएका छन् । यो रुस–युक्रेन युद्धमा भएको हताहतीबारे कुनै पक्षबाट आएको दुर्लभ स्वीकारोक्ति हो । युक्रेनी राष्ट्रपतिले सामाजिक सञ्जाल ‘एक्स’मा एक पोस्ट गर्दै युद्धमैदानमा तीन लाख ७० हजार युक्रेनी घाइते भएको पनि जानकारी दिएका छन् । घाइतेको यो संख्यामा एकभन्दा बढीपटक घाइते भएका र सामान्य घाइते सैनिकको संख्यासमेत गणना भएको जेलेन्स्कीले बताए ।
‘पूर्णस्तरको युद्ध सुरु भएदेखि युक्रेनले युद्ध मैदानमा ४३ हजार सैनिक गुमाएको छ । त्यस्तै घाइतेको उपचारका लागि तीन लाख ७० हजार सहायता प्रदान गरिएको छ । यहाँ उल्लेख गर्नैपर्छ कि घाइते भएकामध्ये झन्डै आधा सैनिक पछि पुनः युद्धको मैदानमा फर्किए । साथै घाइतेको तथ्यांकमा सामान्य चोटपटक तथा दोहोर्याइएको चोटहरू पनि समावेश छन्,’ जेलेन्स्कीले एक्सको पोस्टमा लेखेका छन् । जेलेन्स्कीले आफ्नो पोस्टमा रुसतर्फ युक्रेनको तुलनामा ठुलो हताहती भएको दाबी पनि गर्न छुटाएनन् । युद्धमा करिब एक लाख ९८ हजार रुसी सैनिक मारिएको र पाँच लाख ५० हजार घाइते भएको उनले बताए ।
रुस र युक्रेनले जारी युद्धमा आफ्नो तर्फ भएको सैन्य हताहतीको संख्यालाई खासै खुलाउने गरेका छैनन् । तथापि विपक्षीको हताहतीको स्तर भने बढाइचढाइ गर्दै प्रस्तुत गर्ने गरिएका छन् ।
नवनिर्वाचित अमेरिकी राष्ट्रपति डोनाल्ड ट्रम्पले सामाजिक सञ्जालमा युक्रेनले युद्धमा ‘चार लाख सैनिक गुमाएको’ दाबी गरेपछि जेलेन्स्की उनको तथ्यांक सार्वजनिक गर्न बाध्य भएजस्तो देखिन्छ । ट्रम्पले केहीअघि यस अनावश्यक युद्धमा ‘चार लाख युक्रेनी सैनिक र ६ लाख रुसी सैनिक मारिएको’ लेखेका थिए । ट्रम्पले सो तथ्यांक कहाँबाट लिए भन्ने खुलाएका छैनन् ।
नयाँ तथ्यांकले वर्षको सुरुदेखि युक्रेनी मृत्युमा वृद्धि भएको देखाउँछ । यसअघि फेब्रुअरीमा जेलेन्स्कीले युद्धमैदानमा ३१ हजार युक्रेनी सैनिक मारिएको बताएका थिए । पछिल्लो तथ्यांक रुसी सेनाले पूर्वी युक्रेनमा सफलता हासिल गर्दै कब्जा गरिएको भूमिको क्षेत्रफल बढाउँदै गएका समय आएको छ ।
