एसिया कप क्रिकेट प्रतियोगिताको साबिक विजेता श्रीलंकाले बिहीबार समूह ‘बी’मा बंगलादेशमाथि पाँच विकेटको सानदार जित निकालेको छ । घरेलु मैदानमा श्रीलंका ६६ बलअघि नै विजयी भएको हो । पालेकेले मैदानमा तीनपटकको पूर्वउपविजेता बंगलादेशले पहिलो ब्याटिङ गरेको थियो । बंगलादेश ४२.४ ओभरमा एक सय ६४ रनमा समेटियो ।
प्रत्युत्तरमा श्रीलंकाले ३९ ओभरमा पाँच विकेटको क्षतिमा एक सय ६५ रन बनायो । जितसँगै श्रीलंकाले दुई अंक जोड्यो । यस समूहमा तेस्रो टोली अफगानिस्तान हो । समूह ‘ए’मा पाकिस्तानले नेपालमाथि बुधबार दुई सय ३८ रनको फरकिलो अन्तरले जित निकालेको थियो ।
सदिरा र चरिथबीचको साझेदारी
सहज लक्ष्य पछ्याउँदा श्रीलंकाले पहिलो पावर प्लेमै तीन विकेट गुमाएको थियो । बंगलादेशी बलरले शीर्ष तीन ब्याट्सम्यानलाई पेभेलियन पठाउँदा श्रीलंका ब्याटिङमा कमजोर देखियो । ओपनर पथुम निसांका १३, दिमुथ करुनारत्ने १ र कुशल मेन्डिस १ रनमा आउट हुँदा श्रीलंका ४३–३ को अवस्थामा थियो । त्यसपछि सदिरा समाराविक्रम र चथि आसालांकाबीच चौथो विकेटका लागि ७८ रनको महत्वपूर्ण साझेदारी भयो । श्रीलंकाको जित आधार यही साझेदारी भयो ।
दुवै ब्याट्सम्यानले ९.२ देखि २९.१ ओभरसम्म श्रीलंकाली ब्याटिङ इनिङ्स अगाडि बढाए । सदिरा र चरिथले आक्रामक ब्याटिङ गरेनन् । बंगलादेशी बलरको कमजोर बल फ्याँकेको अवस्थामा स्ट्रोक लगाए । सदिराले ७७ बलमा ५४ रनको अर्धशतकीय इनिङ्स खेले । उनले आफ्नो इनिङ्समा ६ चौका प्रहार गरे । उनलाई महेदी हसनले विकेटपछाडि मुस्फिकर रहिमबाट क्याचआउट गराए ।
सदिराले कप्तान दुसान संनकासँग छैटौँ विकेटका लागि अविजित ४४ रनको साझदोरी गरे । दुसानले २१ बलमा एक चौकाको सहयोगमा १४ रन बनाए । श्रीलंकाको जितमा महत्वपूर्ण योगदान दिएका सदिराले ९२ बल खेल्दै ६२ रन जोडे । उनले पाँच चौका र एक छक्का प्रहार गरे । श्रीलंकाको ब्याटिङमा एक मात्र छक्का उनले नै प्रहार गरेका थिए ।
सकिबले लिए दुई विकेट
बंगलादेशका कप्तान सकिब अल हसनले श्रीलंकाली ब्याट्सम्यानलाई रोक्ने काम गरे । उनले आफ्नो १० ओभरको स्पेलमा कसिलो बलिङ गर्दै केवल २९ रन खर्चंदै दुई विकेट लिए । यसक्रममा उनले दुई मेडन ओभर फ्याँके । सकिबले धनञ्जय डी सिल्भा र कुशलको विकेट लिए । यसैगरी, तक्सिन अहमेदले सात ओभरमा एक मेडन राखी एक विकेट हात पारे । इस्लामले २३ रन खर्चंदै एक विकेट लिए । महेदीले १० ओभरमा ३५ रन खर्चंदै एक विकेट हात पारे । बंगलादेशका लागि हसन मिर्जाले मात्र विकेट लिन सकेनन् । बंगलादेशी बलरले १३ अतिरिक्त रन दिएका थिए ।
पथिरानाको घातक बलिङ
पहिलो ब्याटिङ गरेको बंगलादेशले श्रीलंकाली बलर मथिस पथिरानाको घातक बलिङ सामना गर्न सकेनन् । उनले केवल ७.४ ओभरमा ३२ रन खर्चंदै चार विकेट हात पारे । उनले आफ्नो स्पेलमा २६ डट बल फ्याँकेका थिए । बंगलादेशी ब्याट्सम्यानले पथिरानाविरुद्ध दुई चौका प्रहार गरे । यसैगरी, महिश थिसनाले आठ ओभरमा १९ रन दिँदै दुई विकेट लिए । उनी आइसिसीको एसिया कपमा प्रभाव पार्न सक्ने खेलाडीको सूचीमा परेका थिए । श्रीलंकाका लागि वालागाने र दुसानले समान एक विकेट लिएका थिए ।
नजमुलको सर्वाधिक ८९ रन
कमजोर ब्याटिङ प्रदर्शन गरेको बंगलादेशका लागि तेस्रो क्रमका ब्याट्सम्यान नजमुल होसेनले सर्वाधिक ८९ रनको योगदान दिएका थिए । उनले एक सय २२ बल सामना गरेका थिए । यसक्रममा उनले सात चौका प्रहार गरे । इनिङ्सको ४१.२ ओभरमा उनी आउट भए । उनी आउट हुँदा बंगलादेश १६२–८ को अवस्थामा थियो । बंगलादेशले अन्तिम चार विकेट दुई रनभित्र गुमाएको थियो । बंगलादेशका नजमुलबाहेक अन्य कुनै पनि ब्याट्सम्यानले गतिलो रन बनाएनन् ।
नेपाली क्रिकेट टोली श्रीलंकामा
नेपाली राष्ट्रिय क्रिकेट टोली एसिया कप क्रिकेटअन्तर्गत भारतविरुद्ध प्रतिस्पर्धा गर्न बिहीबार बिहान श्रीलंका पुगेको छ । नेपालले ४ सेप्टेम्बरमा सर्वाधिक विजेता भारतसँग खेल्दै छ । प्रतियोगिताको उद्घाटन खेलमा नेपाल आयोजक पाकिस्तानसँग दुई सय ३८ रनले पराजित भएको थियो ।
