उपनिर्वाचनको मतगणनाको प्रारम्भिक परिणामबाट आफूलाई वैकल्पिक दाबी गरिरहेका तथा गत मंसिरको निर्वाचनमा नयाँ शक्तिका रूपमा उदाएका दलहरू उत्साही देखिएका छन् । उनीहरूले उपनिर्वाचनको प्रारम्भिक मतपरिणामले पुराना दलसँग जनता थाकेको सन्देश दिएको र नयाँ शक्तिप्रतिको आशा सञ्चार गरेको प्रतिक्रिया दिएका छन् ।
राष्ट्रिय स्वतन्त्र पार्टीका महामन्त्री मुकुल ढकाल उपनिर्वाचनको प्रारम्भिक मत रुझानले मतदाता परिवर्तनको पक्षमा रहेको सन्देश दिने बताउँछन् । ‘पुराना र ठूला भनिएका दलबाट जनता थाकिसके,’ उनले भने, ‘धेरै अघिदेखि यी दलहरूप्रति जनताको वितृष्ण फैलिरहेको थियो । तर, एउटै मुहानमा आउन ठाउँ पाइरहेको थिएन । रास्वपाको स्थापनापछि जनताको वितृष्णा हाम्रो मुहानमा आएर पोखिन सफल भएको छ । यो परिणामले डेलिभरी र सुशासनको एजेन्डालाई जनताले स्वीकृत गरेको संकेत दिएको छ ।’
प्रारम्भिक मतगणनाले थप जिम्मेवारीबोध गराएको छ : रवि लामिछाने रास्वपा सभापति
उत्साहित छु । खुसी लागेको छ । मैले विगतमा विजयी हुँदा दुर्गममा काम गर्छु भनेको थिएँ । केही काम सुरुवात भए । हामी नयाँ थियौँ । पार्टी नयाँ थियो । मतदाताले चिन्नुभएको पनि थिएन । यो मतले अझै बढी जिम्मेवारीको महसुस भएको छ । पहिलेभन्दा अझ राम्रो नतिजा आउँछ भन्ने अपेक्षा छ ।
विभिन्न क्षेत्रका विज्ञलाई उम्मेदवार बनाउनु पनि रास्वपाप्रति आकर्षणको कारण रहेको उनी बताउँछन् । ‘विभिन्न क्षेत्रका अब्बल, स्वच्छ छविका र विज्ञ व्यक्तिहरू हाम्रो पार्टीमा लागेका छन् । आफ्नो पेसामार्फत जनता सेवालाई दिएर उनीहरूमाझ भिजेका व्यक्तिलाई उम्मेदवार बनायौँ । जसकारण पनि हामीप्रति जनताको विश्वास र आशा देखिएको हो,’ उनले भने ।
रास्वपाका सभापति रवि लामिछानेको सांसद पद गुमेपछि उपनिर्वाचनमार्फत पुनः उम्मेदवार बनेका उनले एकको बदला तीन सांसद लिएर कमब्याक गर्ने रास्वपाको रणनीति रहेको सार्वजनिक रूपमै बताएका थिए । तर, उपनिर्वाचनको प्रारम्भिक मतपरिणामले दुइ निर्वाचन क्षेत्रमा मात्रै अग्रता बढाएको देखिन्छ । ‘बारामा हाम्रो होमवर्क अलि पुग्न सकेन, यसमा समीक्षा गर्र्छौँ,’ महामन्त्री ढकालले भने ।
सिके राउत नेतृत्वको जनमत पार्टीकी प्रमुख सचेतक अनिता देवी ठूला दलप्रति रहेको जनताको ‘फ्रस्टेसन’ मंसिर निर्वाचन र अहिलेको उपनिर्वाचनमा पोखिएको बताउँछिन् । ‘यो उपनिर्वाचनले पुराना र ठूला दलहरूबाट जनता आजित भइसके भन्ने जवाफ दिएको छ,’ उनले भनिन्, ‘पुरानालाई पटकपटक मत दिएर के पायौँ भनेर जनताले आत्मसमीक्षा गरे । पटकपटक हेरेकालाई भन्दा नयाँलाई हेरौँ भन्ने मतदाताको मुड देखियो । नयाँले पनि गरेनन् भने भोलि उनीहरूलाई पनि हटाउँछन् ।’ बारा २ मा जसपाका अध्यक्ष यादवलाई हराउन जनमतका अध्यक्ष राउत स्वयं मैदानमा खटिएका थिए ।
जनता समाजवादी पार्टीका प्रवक्ता मनीष सुमन उपनिर्वाचनको प्रारम्भिक मत रुझानले आमजनताको रोजाइमा वैकल्पिक पार्टीहरू देखिएको बताउँछन् । ‘कांग्रेस, माओवादी र एमालेभन्दा वैकल्पिक पार्टीहरू रोजेको देखियो,’ उनले भने, ‘बारा २ कै कुरा गर्दा त्यहाँ कांग्रेस र माओवादीले जसपालाई समर्थन गरे पनि एमालेले त गरेको थिएन । तैपनि एमाले प्रतिस्पर्धामा देखिएन ।’ सुमन जसपालाई बारामा र रास्वपालाई चितवन र तनहुँमा मत दिएर मतदाताले परम्परावादी पार्टीहरूलाई गतिलो सन्देश दिएको बताउँछन् ।
त्यस्तै, सत्तागठबन्धनमा रहेको लोसपाका नेता डा. सुरेन्द्र झा उपनिर्वाचनमा देखिएको जनताको वितृष्णा संघर्षबाट प्राप्त भएको व्यवस्थाको स्पिरिटअनुसार राजनीतिक दल हिँड्न नसक्नुको परिणाम ठान्छन् । ‘जुन संघर्ष गरेर हामीले बहुदलीय व्यवस्था ल्यायौँ, त्यसको स्पिरिटअनुसार पुराना र ठूला भनिएका राजनीतिक दलहरू अघि बढ्न सकेनन्,’ उनले भने, ‘एकदलीय प्रणालीजस्तो सिन्डिकेट गरेर जबर्जस्ती उम्मेदवार लाद्ने प्रवृत्ति रह्यो, जसलाई नागरिकले नरुचाएको देखियो । अर्को कुरा, जनतालाई मत माग्दा समाज रूपान्तरण र विकासको एजेन्डाभन्दा पनि जसरी हामीकहाँ जिताएर पठाइदिनुस्, म मन्त्री बनाइदिन्छु भन्ने आश्वासन देखियो, जनताले यसको पनि जवाफ दिए ।’
