खेलकुद प्रिन्ट संस्करण

फुटबल खेलाडी अस्ट्रेलिया भासिँदै

खेलकुद संरचना बलियो नहुनु र खेलेर नै जीविकोपार्जन गर्न नसकिने अवस्थाका कारण प्रतिभाशाली तथा उदीयमान खेलाडी सुन्दर भविष्य खोज्दै अस्ट्रेलिया भासिने क्रम जारी

असोजको पहिलो साता सिनियर तथा उमेर समूहको नेपाली राष्ट्रिय फुटबल टोलीबाट प्रतिनिधित्व गरिसकेका प्रतिभावान् खेलाडी अस्ट्रेलियातर्फ आफ्नो भविष्य खोज्दै उडेका थिए । फुटबल करिअर चटक्कै छाडेर अस्ट्रेलिया जानुपर्दा उनीहरूको अनुहार मलिन थियो । त्रिभुवन विमानस्थलमा आफन्तजन तथा साथीहरूले बिदाइ गर्दा उनीहरूको अनुहारमा कृत्रिम मुस्कान देखिन्थ्यो ।

घरेलु खेलकुद संरचना बलियो नहुनु र खेलेर नै जीविकोपार्जन गर्न नसकिने अवस्थाका कारण नेपालबाट प्रतिनिधित्व गरेका विभिन्न खेलका खेलाडी अस्ट्रेलिया पलायन हुने क्रम बढ्दो छ । राष्ट्रिय टोलीबाट खेलिसकेका शिव गुरुङ र आकाश मगरसँगै रेजिन सुब्बा गत साता मात्रै अस्ट्रेलियातर्फ लागेका थिए । यसअघि राष्ट्रिय टोलीका डिफेन्डर राजन गुरुङ, मिक्छेन तामाङसँगै यू–२३ बाट प्रतिस्पर्धा गरेका अमिर श्रेष्ठ असोजको पहिलो साता अष्ट्रेलिया पुगेका हुन् । उनीहरूसँगै सहिद स्माकर ‘ए’ डिभिजन लिगमा उत्कृष्ट प्रदर्शन गरेका रुमेश बर्ताैला र रवि थिङ अस्टे«लिया नै पुगेका छन् । पछिल्लो समय नेपाली खेलाडीहरूका लागि आकर्षक बनिरहेको देश अस्ट्रेलिया हो । 

अस्ट्रेलियामा राम्रो आम्दानी मात्र होइन, भविष्यसमेत सुनिश्चित हुने देखी प्रत्येक महिनाजसो नेपालका राम्रा तथा उदीयमान खेलाडी त्यसतर्फ उडिरहेका छन् । यही क्रम जारी रहँदा निकट भविष्यमा हुने सहिद स्मारक ‘ए’ डिभिजन लिगमा एक दर्जनभन्दा बढी खेलाडी घरेलु लिगमा देखिनेछैनन् । नेपालको घरेलु फुटबल संरचना बलियो नहुँदा र वेला–वेलामा हुने फुटबल विवादले राष्ट्रिय टोलीका वर्तमान ठूला अनुहारसमेत विदेश पलायन हुने अवस्थामा छन् ।

नेपालमा खेलेरै जीवन निर्वाह गर्न मुस्किल पर्न थालेपछि खेलाडीले दोस्रो विकल्पका रूपमा बिदेसिने बाटो रोजेका हुन् । नेपाली खेलाडीहरू अस्ट्रेलियामा एक दिन खेल्ने र बाँकी ६ दिन काम गर्छन् । सप्ताहन्तमा हुने अष्ट्रेलियाको स्थानीय लिगबाट खेलाडीले मोटो रकम पाउँदै आएका छन् । यसै मोटो रकममा उनीहरूलाई लोभ्याएको हो । 

गत साउनमा मात्रै आधा दर्जनभन्दा बढी खेलाडी अष्ट्रेलियाया पुगेका थिए । राष्ट्रिय टोलीको प्लेइङ सेटबाट खेल्दै आएका सुमन लामा, आशिष लामा, दर्शन गुरुङ, विमल राना र नवीन गुरुङले अस्ट्रेलियामै आफ्नो सुन्दर भविष्य बनाउन त्यसतर्फ लागे । ‘ए’ डिभिजनमा औसत प्रदर्शन गर्दै आइरहेका गोलरक्षक अजित प्रजापति र नेपालको उमेर समूहमा खेलिसकेका रोहित कार्कीसमेत अष्ट्रेलिया पुगेका छन् । ०७५ सालमा मनाङ मस्र्याङ्दीका डिफेन्डर विमल बस्नेत खेलाडी भिसामा नभई रोजगारीका लागि अष्ट्रेलिया पुगेका थिए । ०७६ साल ‘ए’ डिभिजन लिग चलिरहँदा राष्ट्रिय टोलीबाट खेलिसकेका मिडफिल्डर हेमन गुरुङ र गोलरक्षक एलन न्यौपानेले पनि अष्ट्रेलियालाई नै रोजे । ०७८ सालको लिगमा संकटा क्लबका डिफेन्डर नीरज बस्नेत न्युजिल्यान्डमा रोजगारीका लागि पुगे । 

फुटबलर मात्र होइन, अन्य खेलका खेलाडी पनि भासिँदै
फुटबल खेलका खेलाडी मात्र अष्ट्रेलियामा पुगेका छैनन्, अन्य खेलका नेपाली खेलाडीको बाहुल्यता अस्ट्रेलियामा देखिएको छ । नेपाललाई १३औँ दक्षिण एसियाली खेलकुद (साग)मा पदक जितेका खेलाडी नै पलायन भएका छन् । कराँते कातातर्फ स्वर्णपदक विजेता निर्मला तामाङ र रजत विजेता दिवस श्रेष्ठ पनि उतै छन् । नेपालका टेबलटेनिस नम्बर एक खेलाडी स्यान्टु श्रेष्ठ भने उच्चशिक्षा हासिल गर्न अस्ट्रेलियामा छन् । उनले १३औँ सागमा नेपाललाई रजतसहित चार पदक दिलाएका थिए । नेपाल नम्बर एक चेस खेलाडी विवेक थिङ तीन साताअघि अष्ट्रेलिया पुगे । तेक्वान्दोका केही खेलाडी प्रतियोगिताका लागि अस्ट्रेलिया पुगे । तर, उनीहरू नेपाल फर्केर आएनन् । 

 खेलाडी भन्छन्– नेपालमा भविष्य नदेखेर अष्ट्रेलिया आयौँ 
अस्ट्रेलिया पुगेका खेलाडीहरू नयाँ पत्रिकासँग सम्पर्कमा आउँदा नेपालमा भविष्य नदेखेर नै त्यहाँ पुगेको बताउँछन् । प्रतियोगिता निरन्तर नहुनु र परिवार पाल्न निकै दुःख भएका कारण नै अस्ट्रेलिया पुगेको खेलाडीले बताए । ‘यहाँ हप्तामा एक दिन खेल र बाँकी समय रोजगारी गर्छौं,’ एक खेलाडीले भने । अस्ट्रेलियामा विशेषतः नेपाली समुदायबीच हुने प्रतियोगितामा भाग लिन मेलबर्न, सिड्नी पुग्ने गरेका छन् । स्थानीय कम्युनिटी कप खेल्दा पनि खेलाडीले राम्रो आम्दानी गर्ने गर्छन् । 

खेलाडीहरूका अनुसार एक खेलाडीले खेलबापत मात्र मासिक दुई हजार अस्ट्रेलियन डलर प्राप्त गर्छन् । ‘नेपालमा पछिल्लो समय प्रतियोगिता नै छैन । लिग पनि राम्रोसँग नहुने र समयमा नहुने समस्या छ,’ खेलाडीहरूले भने, ‘नेपालको फुटबललाई एक उचाइमा पुर्‍याउने र आम्दानी राम्रो हुने एनएसएल पनि हुन सकेन ।’ 
अस्ट्रेलियामा नेपाली क्लबबीच राम्रो सम्बन्ध बनेको एक खेलाडीले बताए । ‘यहाँ ( अष्ट्रेलिया) नेपाली क्लबबीच प्रतिस्पर्धा राम्रो बनेको छ, आकर्षण बढ्नुको कारण सेवासुविधा नै हो,’ उनले भने, ‘यहाँ खेल्ने सबै वातावरण राम्रो छ, खेलपछि काम पनि राम्रो पाइन्छ ।’