- वि.सं २०८० मङ्सिर १६ शनिबार
दसैँको चहलपहल सुरु भएको छ । दसैँ भन्नासाथ नयाँ लुगाफाटो, नयाँ सवारीसाधन किन्ने चलन बनिसकेको छ । विगतका दसैँमा झैँ यसपालि पनि मानिसहरू गाडी खरिदमा जुटेका छन् । तर, सरकारको सख्त कर नीतिका कारणले यसपटक ग्राहकहरूको रोजाइमा पेट्रोलियमभन्दा पनि विद्युतीय सवारीसाधन परेका छन् । वातावरणीय हिसाबले पनि पछिल्लो समय इभी (इलेक्ट्रिक भेहिकल)को प्रयोग विश्वव्यापी बढिरहेको छ, जुन भृकुटीमण्डपमा जारी नाडा अटो सोमा पनि देख्न सकिन्छ ।
नेपाली सडकमा विश्वका डेढ दर्जन ब्रान्डका विद्युतीय कार हुइँकिन्छन्, जसमा चिनियाँ ब्रान्डको बिगबिगी छ । विश्वकै चर्चित विद्युतीय ब्रान्ड टेस्लादेखि अउडी, हुन्डाई, एमजी, टाटा, किया, महिन्द्रा, बिवाइडी, दिगो, ग्रेटवाल, पियाजिओ, डेरी, डिएफएसके, ज्याक, होजोन (नेटा भी)लगायत ब्रान्डका विद्युतीय कार नेपालमा प्रयोग हुँदै आइरहेका छन् । तर, अउडी नेपालमा आधिकारिक रूपमा बिक्री हुँदैन ।
नेपालमा २० लाखदेखि साढे तीन करोडसम्मका विद्युतीय कार बिक्री भइरहेको अटो व्यवसायी बताउँछन् । तर, चालू आर्थिक वर्षको बजेटमार्फत सय किलोवाटभन्दा बढी मोटर क्षमता भएका विद्युतीय कारको कर बढाएपछि एमजी, टेस्ला, किया, हुन्डाई आयोनिक फाइभ, टाटा म्याक्सजस्ता कार भित्रिन सकेका छैनन् । बिहीबारदेखि सुरु भएको नाडा इभी सोमा पनि करको मारमा परेका किया र एमजीले सहभागिता जनाएका छैनन् ।
सरकारको विद्युतीय कारको प्रयोग बढाउने नीतिविपरीत अर्थमन्त्री जनार्दन शर्माले कर बढाउँदा किया र एमजीका विद्युतीय गाडीको मूल्य अचाक्ली बढ्यो, जसले गर्दा ती कार भित्रिन छाडेको सम्बन्धित विक्रेता बताउँछन् । विद्युतीय कारको मात्र होइन, स्कुटर र बाइकको बजार पनि बढ्दै गइरहेको छ । अहिले बजारमा दुई दर्जनभन्दा बढी ब्रान्डका विद्युतीय दुईपांग्रे सवारीसाधन भित्रिएका छन् । नाडा इभी सोमै डेढ दर्जनहाराहारी बिक्री तथा प्रदर्शनीमा राखिएको छ ।
अहिले बजारमा १७ किलोवाटदेखि सय किलोवाट आवर क्षमतासम्म ब्याट्री ब्याकअप भएका विद्युतीय कार भित्रिसकेका छन्, जसले एकपटकको फुल ब्याट्री चार्जमा साढे पाँच सय किलोमिटरसम्म माइलेज दिन्छन् । विद्युतीय कार चढ्न चाहनेले आफ्नो आर्थिक अवस्थाअनुसार रोजीरोजी गाडी किन्न सक्ने व्यवसायी बताउँछन् । नेपाल भित्रिएका सबै विद्युतीय कार ब्रान्ड अटो सोमा राखिएका छैनन् ।
