१३ वर्षीया बालिकालाई यौन दुव्र्यवहार गरेको आरोपमा चन्दननाथ नगरपालिका–७ का प्रेमजंग (प्रेमराजा) महतलाई प्रहरीले पक्राउ गरेको छ । पीडित बालिकाकी आमाले जिल्ला प्रहरी कार्यालय जुम्लामा दिएको उजुरीका आधारमा शनिबार पक्राउ गरिएको हो । पीडित बालिका चन्दननाथ नमुना माध्यमिक विद्यालयमा अध्ययनरत थिइन् ।
विद्यालयकी शिक्षिका बबी केसीले भनिन्, ‘ती बालिका सुरुमा स्कुल आउँदा पढाइमा जागरुक थिइन् । केही समयपछि भने उनी विद्यालय आउँदा टोलाएर बस्ने गरेको देखेँ । चासो दिएर सोधेँ । उनी बेस्सरी रुन थालिन् र आफूमाथि करणी भएको बताइन् ।’ त्यसपछि विद्यालयमा अभिभावक भेला बोलाएर यो विषयमा छलफल भयो । छलफलका क्रममा पैसाको प्रलोभनमा परेर आमाले नै घटनाको मिलापत्र गराएको पनि खुल्यो । ‘बालिकाकी आमासमेत आइन् । उनलाई मैले नराम्ररी झपारेँ,’ केसीले भनिन्, ‘पैसामा मिलापत्र गरेको खबर सुन्नमा आयो । हामीले बालिकाकी आमालाई कानुनी रूपमा जान सुुझायौँ ।’
आमाले दोस्रो बिहे गरेपछि पीडित बालिकालाई जाजरकोट जिल्ला कुशे गाउँपालिकाबाट आफूूसँगै जुम्ला ल्याएकी हुन् । बालिकाकी आमाले जुम्लामा व्यापार गर्छिन् । आरोपित महतले गत वैशाखमा ती बालिकाकी आमासँग सहमति गरी उनलाई घर लगेका थिए । बालिकाले घरायसी काममा सहयोग गर्ने तथा महतले उनलाई पढाइदिने सहमति भएको थियो । तर, महतले एक महिनासम्म पटक–पटक करणी गरेको बालिकाकी आमाको आरोप छ । सबैका अगाडि बाबा भन्न लगाए पनि रातको समयमा करणी गर्ने गरेको खुलेको छ ।
करणीको घटना अरूसमक्ष सुनाए मारिदिने धम्की पनि महतले बालिकालाई दिएका थिए । जसकारण पीडा सहन नसकेर बालिकाले मुसा मार्ने औषधि (विष) खाइन् । त्यसपछि छोरी बिरामी भएको भन्दै उनले आमाको जिम्मा लगाएका थिए । आमाले भनिन्, ‘मुसा मार्ने विष खाएपछि बान्ता भएको र महतले साबुनपानी खुवाएको बालिकाले बताएकी छन् । छोरीले धेरै बान्ता गर्न थालेपछि मैले कारण सोधखोज गर्दा महतले करणी गर्ने गरेको र कुनै उपाय नदेखेर विष खान बाध्य भएको उनले बताइन् ।’
यसपछि महतले पैसा दिएर घटना लुकाउन खोजेका थिए । मिलापत्रका लागि उनीसँग सात लाखको कागज गरेको बालिकाकी आमाले स्विकारिन् । उनले भनिन्, ‘कुरा मिलाएको भन्दै एक लाख रुपैयाँ केही मानिसले बाँडेर लिए । बाँकी ६ लाख रुपैयाँ पीडित बालिकाको जुम्लामा रहेको माछापुच्छ्रे बैंकको खातामा राखिएको छ ।’ जिल्ला प्रहरी कार्यालय जुम्लाका डिएसपी नरेन्द्र चन्दले घटनाका सम्बन्धमा थप अनुसन्धान भइरहेको बताए ।
मिलापत्रको घटनामा मानव अधिकार आयोगको चासो
घटनाका विषयमा राष्ट्रिय मानव अधिकार आयोग कर्णाली प्रदेश शाखा कार्यालय जुम्लाले चासो लिएको छ । आयोगका शाखा कार्यालय जुम्लाका प्रमुख बुद्धनारायण साहनी र मानव अधिकार अधिकृत धनराज शाहीको टोलीले पीडित बालिकाकी आमा र प्रहरीसँग भेटेर घटनाबारे सोधपुछ गरेको हो । ‘आयोगले यो घटनालाई गम्भीर फौजदारी अपराध र बालअधिकार हनन तथा यौन दुव्र्यवहारका रूपमा लिएको छ । पीडितले न्याय पाउनुपर्छ भन्ने छ,’ आयोगको शाखा प्रमुख साहनीले भने । घटना सामसुम पार्न खोज्ने मतियारलाई पनि अनुसन्धानको दायरामा ल्याएर कारबाही प्रक्रियामा लैजानका लागि ध्यानाकर्षण गरिएको आयोगले जनाएको छ ।
