एसइई दिएर बसेका विद्यार्थीका लागि पोखराको अन्नपूर्ण केबुलकारले विशेष अफर ल्याएको छ । कम्पनीले आगामी दिनमा उच्च शिक्षा अध्ययन गर्नका लागि प्रोत्साहन गर्ने र मिहिनेती हातहरूलाई अझ मिहिनेती बन्नका लागि ऊर्जा प्रदान गर्दै केही समय भए पनि रमाइलो बनाउने उद्देश्यका साथ उनीहरूलाई केबुलकार चढ्दा ५० प्रतिशत छुट दिने अफर ल्याएको हो ।
अफरअनुसारको छुट पाउनका लागि विद्यार्थीले एसइईमा परीक्षामा सामेल भएको प्रवेशपत्र देखाउनुपर्ने कम्पनीले जनाएको छ । योजना ३० वैशाखसम्म लागू हुने जनाइएको छ ।
नवविवाहित जोडीलाई पनि छुट
कम्पनीले, नवविवाहित जोडीका लागि पनि अफरको घोषणा गरेको छ । जसअन्तर्गत एउटा टिकटको खरिदमा अर्काे एक केबुलकारको टिकट निःशुल्क प्रदान गर्ने जनाइएको छ । यो योजनाअनुसारको छुट पाउनका लागि नवविवाहित जोडीले आफू विवाहित भएको विवाह कार्ड देखाउनुपर्ने सर्त राखिएको छ । योजना असार मसान्तसम्म लागू हुने जनाइएको छ ।