न्यायसेवाका सहसचिव र उपसचिवहरूको बढुवा र पदस्थापन

न्यायसेवा आयोगको बैठकले न्याय, कानुन र सरकारी वकिल समूहका सहसचिव र उपसचिवहरूको बढुवा र पदस्थापना गरेको छ। आयोगका अध्यक्ष तथा प्रधानन्यायाधीश चोलेन्द्रशमशेर जबराको संयोजकत्वमा बसेको बैठकले शुक्रबार यस्तो निर्णय गरेको हो।

प्रधानन्यायाधीश जबराविरुद्ध नेपाल बार एसोसियसनले आन्दोलन सुरु गरेपछि भूमिकाविहीन अवस्थामा रहेका प्रधानन्यायाधीशले आयोगको बैठक राखेर यस्तो निर्णय गरेका हुन्।  जबराले यसअघि ७ पुसमा बैठक आह्वान गरेका थिए। तर, त्यसवेला आयोगको बैठक स्थगित भएको थियो।

प्रधानन्यायाधीश अध्यक्ष रहने आयोगको सदस्यमा संघीय कानुन तथा न्यायमन्त्री, सर्वोच्च अदालतका वरिष्ठतम् न्यायाधीश, लोकसेवा आयोगका अध्यक्ष र महान्यायाधिवक्ता रहने व्यवस्था रहेको छ।