Skip This
कर्णाली प्रदेशमा राष्ट्रिय सभा सदस्य निर्वाचनका लागि ६ जनाको उम्मेदवारी दर्ता भएको छ। तीनजना सदस्य पदका लागि ६ जनाको उम्मेदवारी दर्ता भएको हो। नेपाली कांग्रेस, माओवादी केन्द्र र एकीकृत समाजवादीलगायत गठबन्धन दलका तर्फबाट तीनजना र नेकपा एमालेका तर्फबाट तीनजनाले उम्मेदवारी दर्ता गराएका छन्।
गठबन्धनबाट नेकपा माओवादी केन्द्रका नरबहादुर विष्ट (सुर्खेत), नेपाली कांग्रेसका दुर्गाकुमारी गुरुङ (सुर्खेत), नेकपा एकीकृत समाजवादीका उदयबहादुर बोहरा (सल्यान) ले उम्मेदवारी दर्ता गराएका छन् भने नेकपा एमालेबाट चूडामणि शर्मा (सुर्खेत), पदबहादुर माझी (दैलेख) र गंगा थापा महत (जुम्ला) ले उम्मेदवारी दर्ता गराएका हुन्। कर्णालीमा प्रदेश सभाका ३५ सांसद र ७९ पालिकाका प्रमुख–उपप्रमुख तथा अध्यक्ष–उपाध्यक्ष एक सय ५६ गरी एक सय ९१ जनाले मतदान गर्नेछन्।
