रसुवाको धार्मिक तथा पवित्र तीर्थस्थल गोसाइँकुण्डमा जनैपूर्णिमाको अवसरमा लाग्ने मेला स्थगित भएको छ । हरेक वर्ष नागपञ्चमीदेखि साउन शुक्ल पूर्णिमा अर्थात् जनैपूर्णिमाका दिनसम्म लाग्ने गोसाइँकुण्ड मेला यो वर्ष स्थगित गरिएको हो ।
शुक्रबार गोसाइँकुण्ड क्षेत्र विकास समितिका अध्यक्ष सञ्जीव डिएमले मेला स्थगित गर्ने निर्णय भएको जानकारी दिए । कोरोना संक्रमणदर नियमित बढिरहेकाले जनैपूर्णिमाको अवसरमा गोसाइँकुण्ड दर्शनमा हुन सक्ने भिड एवं तीर्थालुहरूको आवागमनबाट संक्रमणदर बढ्ने भएकाले मेला स्थगत गर्ने निर्णय भएको उनले बताए ।
मेला सञ्चालन नहुने भए पनि गोरखनाथ बाबाको टोली भने आउने उनले बताए । कोरोना संक्रमण सुरुअघिसम्म व्यवस्थित रूपमा मेला सञ्चालन गर्ने गरिएको थियो । तर, कोरोना संक्रमण सुरु भएयता मेला सञ्चालन हुन सकेको छैन ।
जनैपूर्णिमाको अवसरमा गोसाइँकुण्डमा लाग्ने मेला यो वर्ष शुक्रबारदेखि सुरु भएको छ । सामान्य समयमा मेला भदौ ६ गते जनैपूर्णिमासम्म लाग्ने गर्दछ ।