चार दिनदेखि हराएका युवक मृत फेला

Read Time : < 1 मिनेट

केशव गुरुङ, गोरखा

नयाँ पत्रिका

२o८१ बैशाख २४ सोमबार १७:४४:oo

चार दिनदेखि हराएका एक युवक मृत अवस्थामा भेटिएका छन् । गोरखा नगरपालिका– ८ थाकलडाँडाका २७ वर्षीय मीनप्रसाद रोका मृत अवस्थामा भेटिएका हुन् । चैत ३१ गते राति पसल जाने भन्दै घरबाट निस्किएका उनी त्यस दिनदेखि बेपत्ता भएका थिए । आफन्त र स्थानीयले खोजी गर्दासमेत उनी फेला पर्न सकेका थिएनन् ।

थाकलडाँडाकै एउटा रूखमा झुन्डिएको अवस्थामा उनको शव फेला परेपछि स्थानीयले प्रहरीलाई खबर गरेका थिए । जिल्ला प्रहरी कार्यालय गोरखाका डिएसपी प्रकाश दाहालका अनुसार थाकलडाँडाको पाखोमा चिलाउने रूखमा तारको पासो लगाई झुन्डिएको अवस्थामा उनको शव फेला परेकाे हाे ।

घटना भएको चार दिन भइसकेकाले शव गन्हाउने भइसकेकोसमेत उनले बताए । रोकाको शव पोस्टमार्टमका लागि गोरखा अस्पताल ल्याइएको छ । घटनाको थप अनुसन्धान भइरहेको प्रहरीले जनाएको छ ।

#मृत्यु