कर्णाली प्रदेशका विभिन्न जिल्लामा रहेका अधिकांश कोरोना भाइरस संक्रमित होम आइसोलेसनमा बसेका छन् । शुक्रबारसम्म कर्णालीमा पाँच सय ५९ जना सक्रिय संक्रमित रहेका छन् ।
उनीहरूमध्ये अधिकांश होम आइसोलेसनमा रहेको प्रदेशको सामाजिक विकास मन्त्रालयले जनाएको छ । प्रदेशमा सबैभन्दा बढी सुर्खेतमा ६ सय ४० जना संक्रमित होम आइसोलेसनमा रहेका छन् । उनीहरूमध्ये वीरेन्द्रनगर नगरपालिकामा तीन सय ७१ र भेरीगंगा नगरपालिकामा दुई सय ६९ जना रहेका छन् ।
त्यस्तै, सल्यानमा रहेका १४ जना संक्रमित होम आइसोलेनमै छन् । रुकुम (पश्चिम)मा १८ जनामध्ये आठ, जुम्लामा ४६ मध्ये ३३ जना होम आइसोलनमा बसिरहेका छन् । मुगुका सबै ११ जना होम आइसोलेसनमा रहेको सामाजिक विकास मन्त्रालयले जनाएको छ ।
कर्णाली प्रदेशमा पछिल्लो २४ घन्टामा ३८ जनामा संक्रमण देखिएको छ । प्रदेश अस्पताल/पशुपन्छी रोग अन्वेषण प्रयोगशालामा गरिएको परीक्षणमा ३८ जनामा संक्रमण पुष्टि भएको हो ।
जसमध्ये सुर्खेतमा २४, हुम्लामा चार, रुकुम पश्चिममा दुई, जाजरकोट, दैलेख, सल्यानमा एक–एकजनामा संक्रमण देखिएको स्वास्थ्य सेवा महाशाखाका प्रमुख बृषबहादुर शाहीले बताए ।