राष्ट्रिय सभाका पूर्वसांसद इन्द्रहाङ लिम्बूको कोरोना संक्रमणका कारण बिहीबार बिहान होम आइसोलेसनमा निधन भएको छ ।
सुनसरीको धरान– १८ का ९२ वर्षीय लिम्बूको निवासमै बिहान निधन भएको परिवारले जनाएका छन् ।
धरान– १८ का वडाध्यक्ष नरेन्द्रकुमार राईका अनुसार मधुमेहलगायतका दीर्घरोग भएका लिम्बूलाई गत आइतबार स्वास्थ्यमा थप समस्या देखिएपछि बिपी कोइराला स्वास्थ्य विज्ञान प्रतिष्ठान धरानमा उपचारका लागि पुऱ्याइएको थियो ।
आइतबार नै घर फर्केका उनमा सोमबार मात्र कोरोना पजिटिभ देखिएको थियो ।
०४८ सालपछि उनी राष्ट्रिय सभामा निर्वाचित भएका थिए । उनी नेपाली कांग्रेसको केन्द्रीय प्रतिनिधिसमेत भइसकेका क्रियाशील कार्यकर्ता थिए ।
लिम्बूको शव व्यवस्थापनका लागि धरान उपमहानगरपालिका र नेपाली सेनासँग समन्वय गरी आज दिउँसो १ बजेसम्ममा शव व्यवस्थापन गर्ने तयारी भइरहेको वडाध्यक्ष राईले जानकारी दिए ।