- वि.सं २o८१ बैशाख २३ आइतबार
बाँकेमा कोरोनाबाट मृत्यु हुनेको संख्या १२ पुग्याे
बाँकेमा कोरोना संक्रमणबाट आज बिहान थप एकजना पुरुषको मृत्यु भएको छ । नेपालगन्ज मेडिकल कलेजको कोहलपुरस्थित शिक्षण अस्पतालमा रहेको कोभिड आइसोलेसनमा भर्ना भएका नेपालगन्ज उपमहानगरपालिका- ३ एक्लैनीनिवासी ५२ वर्षीय पुरुषको आज बिहान मृत्यु भएको स्वास्थ्य कार्यालय बाँकेका कोरोना स्रोत व्यक्ति नरेश श्रेष्ठले जानकारी दिए
उनका अनुसार श्वासप्रश्वासमा समस्या भएपछि असोज ६ गते राति ११ बजे अस्पताल भर्ना गरिएको थियो । यसअघि नै कोरोनाको आशंकामा ६ गते स्वाब लिएर परीक्षण गर्दा उनको अपराह्न ४ बजे रिपोर्ट पोजेटिभ आएको थियो ।
दुवैतिरको फोक्सोमा निमोनिया र उच्च रक्तचापको समस्या देखिएकाले रोगको प्रकृतिअनुसार गरिनुपर्ने सबै प्रकारको उपचार गर्दासमेत बिरामीको अवस्थामा सुधार आउन नसकी उपचारकै क्रममा मृत्यु भएको जिल्ला स्वास्थ्य कार्यालय बाँकेका अधिकृत एवं कोरोना स्रोत व्यक्ति श्रेष्ठले बताए ।
बाँकेका प्रमुख जिल्ला अधिकारी रामबहादुर कुरुम्बाङले निधनप्रति दु:ख व्यक्त गर्दै मृतकको घरपरिवार र नेपाली सेनासँगको समन्वयमा शव व्यवस्थापनको तयारी भइरहेको जानकारी दिए ।
योसँगै बाँकेमा कोरोनाबाट मृत्यु हुनेको संख्या १२ पुगेको छ । बाँकेका विभिन्न आइसोलेसन अस्पताल र केन्द्रमा तीन सय ८४ संक्रमितको उपचार भइरहेको छ ।
