मुख्य समाचार प्रिन्ट संस्करण

राष्ट्रसंघीय महासभालाई प्रधानमन्त्री ओलीले भर्चुअल सम्बोधन गर्ने, भिडियो रेकर्ड न्युयोर्क पुग्यो

संयुक्त राष्ट्रसंघीय ७५औँ महासभाका उच्चस्तरीय बैठक एवं बहसमा राष्ट्रपति विद्यादेवी भण्डारी, प्रधानमन्त्री केपी शर्मा ओली, परराष्ट्रमन्त्री प्रदीप ज्ञवालीले भर्चुअल सम्बोधन गर्ने भएका छन् । महासभाको मुख्य कार्यक्रम ‘जनरल डिबेट’मा प्रधानमन्त्री ओलीले ९ असोजमा सम्बोधन गर्ने कार्यक्रम छ । ओलीको सम्बोधनको रेकर्ड राष्ट्रसंघीय महासभामा पुगिसकेको छ । 

स्थापनाको ७५ वर्षमा पहिलोपटक राष्ट्रसंघीय महासभासहित सबै तहका बैठक एवं बहस–छलफल सोमबारदेखि भर्चुअल माध्यमबाट सुरु भएका छन्, जहाँ विश्वका सरकार तथा राष्ट्रप्रमुखहरूले भर्चुअल सम्बोधन गर्दै छन् । एक सय ९३ मुलुक सदस्य रहेको राष्ट्रसंघमा अन्य देशका सरकार तथा राष्ट्रप्रमुखसँगै नेपाल पनि भर्चुअल बैठकमा सहभागी हुँदै छ । 

महासभा विश्वका उच्च राजनीतिक नेतृत्व र कूटनीतिज्ञ जमघट हुने महाभेला हो । इतिहासमा पहिलोपटक विश्वका नेताले महासभालाई भिडियोमार्फत सम्बोधन गर्नेछन् । शीर्ष नेताले १५ मिनेट लामो भाषण रेकर्ड गरेर पठाउनुपर्ने र समय–तालिका मिलाएर महासभामा प्रसारण गर्ने नियम तोकिएको छ । 

परराष्ट्र मन्त्रालयका अनुसार राष्ट्रपति भण्डारीले १५ असोजमा बेइजिङ प्लस (महिला अधिकारसम्बन्धी) उच्चस्तरीय बैठकलाई सम्बोधन गर्ने कार्यक्रम छ । भण्डारीको यसबाहेक अन्य बैठकमा सहभागी हुने कार्यक्रम छैन । परराष्ट्र मन्त्रालयका अनुसार प्रधानमन्त्री ओलीले भने महासभाको जनरल डिबेटसहित कम्तीमा ६ वटा उच्चस्तरीय बैठकलाई सम्बोधन गर्नेछन् । कतिपय बैठकका लागि उनले सम्बोधनको भिडियो रेकर्ड गरेर पठाइसकेका छन् । 

परराष्ट्र मन्त्रालयका अनुसार प्रधानमन्त्री ओलीले शुक्रबार दिगो विकास लक्ष्यसम्बन्धी उच्चस्तरीय बैठकलाई सम्बोधन गर्ने कार्यक्रम छ । प्रधानमन्त्री ओलीले ५ असोजमा संयुक्त राष्ट्रसंघको ७५औँ वार्षिकोत्सवका अवसरमा महासचिव एन्टोनियो गुटेरसद्वारा आयोजित समारोहलाई सम्बोधन गर्नेछन् । कार्यक्रममा विश्वका अन्य नेताहरूले पनि सम्बोधन गर्नेछन् । प्रधानमन्त्री ओलीले यीबाहेक गरिबी निवारण, जैविक विविधितासम्बन्धी उच्चस्तरीय बैठकलाई पनि सम्बोधन गर्ने मन्त्रालयले जनाएको छ । 

यसबाहेक परराष्ट्रमन्त्री ज्ञवालीले राष्ट्रसंघका कम्तीमा चारवटा बैठकलाई सम्बोधन गर्नेछन् । त्यही सिलसिलामा ज्ञवालीले ८ असोजमा सार्क परराष्ट्रमन्त्रीस्तरीय अनौपचारिक बैठकको अध्यक्षता गर्ने कार्यक्रम छ । बैठकमा नेपाल, भुटान, भारत, बंगलादेश, पाकिस्तान, माल्दिभ्स, श्रीलंका, अफगानिस्तानका परराष्ट्रमन्त्रीहरू भिडियो बैठकमा सहभागी हुने तय भइसकेको छ ।

परराष्ट्रमन्त्री ज्ञवालीले सार्क मन्त्रिपरिषद्को अनौपचारिक बैठकबाहेक अल्पविकसित मुलुक, अति अल्पविकसित मुलुकहरूको बैठकलाई सम्बोधन गर्ने कार्यक्रम छ । उनले आणविक निशस्त्रीकरणसम्बन्धी उच्चस्तरीय बैठकलाई पनि सम्बोधन गर्ने तय भएको परराष्ट्र स्रोतले जनाएको छ । 

न्युयोर्कमा हरेक वर्ष सार्क अध्यक्ष मुलुकका परराष्ट्रमन्त्रीको आयोजना र समन्वयमा सार्क मन्त्रिपरिषद् (परराष्ट्रमन्त्रीस्तरीय) अनौपचारिक बैठक हुँदै आएका छन् । पछिल्ला वर्ष भारत र पाकिस्तानबीच जारी तनावका कारण सार्कको शिखर सम्मेलन हुन सकेको छैन ।

कोभिड– १९ को महामारीका कारण राष्ट्रसंघ भवन न्युयोर्कका यसपालि सबै बैठक भिडियोमार्फत तय भएको राष्ट्रसंघले जनाएको छ । न्युयोर्कस्थित राष्ट्रसंघीय भवनमा दैनिक चार सयजनाभन्दा कम व्यक्तिलाई मात्रै प्रवेशको बन्दोबस्त मिलाइएको छ । राष्ट्रसंघको वेबसाइटका अनुसार हरेक देशका एकजना प्रतिनिधिलाई मात्रै भौतिक दूरी कायम गर्ने गरी प्रवेश दिइएको छ ।