पछिल्लो २४ घन्टामा कोरोना संक्रमित भई उपचाररत थप १२ जनाको निधन भएको छ ।
स्वास्थ्य तथा जनसंख्या मन्त्रालयका अनुसार निधन हुनेमा ६ पुरुष र ६ जना महिला छन् ।
मृत्यु भएकामध्ये काठमाडौं उपत्यकाका पाँचजना छन् । काठमाडौंकी ८९ वर्षीया, ललितपुरकी ७० वर्षीया महिला र काठमाडौंका ७० वर्षीय, ७५ वर्षीय र भक्तपुरका ४० वर्षीय पुरुष छन् ।
त्यसैगरी चितवनमा १८ र ५५ वर्षीया दुई महिला, तनहुँकी २० वर्षीया र कपिलवस्तुकी ६० वर्षीया महिला छन् ।
बाराका ९७ वर्षीय, चितवनका ६५ वर्षीय र धादिङका ४७ वर्षीय पुरुषको मृत्यु भएको मन्त्रालयका प्रवक्ता डा. जागेश्वर गौतमले बताए ।
हालसम्म कोरोना संक्रमणबाट नेपालमा दुई सय ५१ जनाको निधन भएको छ ।
गौतमका अनुसार संक्रमितको मृत्यु हुने दर ०.६ प्रतिशत छ ।