वरिपरि हिमशृंखला र पहाडले घेरिएर बसेको छ नेपालकै सबैभन्दा ठूलो ताल रारा । कर्णाली प्रदेशको मुगु जिल्लामा रहेको यो ताल समुद्र सतहदेखि करिब दुई हजार नौ सय ७२ मिटरको उचाइमा छ । सन् २००८ मा रामसार क्षेत्र घोषणा गरिएको रारा ताल १०.८ किलोमिटर क्षेत्रफलमा फैलिएको छ ।
यसको औसत लम्बाइ पाँच किलोमिटर र चौडाइ तीन किलोमिटर छ भने गहिराइ १६७ मिटर छ । राराको सौन्दर्य हेर्नका लागि मानिस बाह्रै महिना यहाँ पुग्ने गर्छन् । हिउँदको समयमा रारा ताल हिउँले भरिन्छ । वर्षामा हिउँ पग्लेर फूलैफूलले ढाक्छ ।
यसको सौन्दर्यमा मन्त्रमुग्ध हुनका लागि सबैभन्दा उपयुक्त ठाउँ हो मुर्मा टप । समुद्री सतहदेखि करिब तीन हजार आठ सय मिटरको उचाइमा अवस्थित मुर्माटपबाट राराताललाई पूरै नियाल्न सकिन्छ । मौसम खुलेको वेला वरिपरि रहेका हिमाल, निलो र शान्त रारा तालका साथै बोनसको रूपमा सुदूरपश्चिमका ६ वटा जिल्ला मुर्मा टपबाट देख्न सकिन्छ ।
रारा तालबाट मुर्माटप पुग्न दुई घन्टाको पैदल दूरी पार गर्नुपर्छ भने हिँड्न नसक्नेका लागि घोडाबाट डेढ घन्टामा पुगिन्छ । ताल रारा राष्ट्रिय निकुञ्जभित्र पर्ने भएकाले सवारीसाधन निषेध गरिएको छ । तालमा पुग्न मिली चौरदेखि पैदल हिँड्नुपर्छ । मिली चौरदेखि पैदल हिँडेको ३० मिनेटमै तालको छेउ पुग्न सकिन्छ ।
तालको छेउमा पुगेपछि त्यहाँको दृश्यले सबै थकान मेटाउँछ । नीलो, शान्त र सुन्दरताले भरिपूर्ण राराको किनारै–किनारै हिँड्ने हो भने करिब पाँच घन्टामा एक फेरो मार्न सकिन्छ । विभिन्न कोणबाट राराको सुन्दरताका अलावा निकुञ्ज क्षेत्रको जंगलमा रहेका रूख र यहाँ पाइने चराचुरुंगीको आवाजले जो कसैलाई आह्लादित बनाइदिन्छ ।
प्रकृतिको काख सुन्दर शान्त रारा पुग्न दुई विकल्प छन् । पहिलो, कर्णालीको सदरमुकाम सुर्खेतदेखि दुई दिन गाडीको यात्राबाट रारा पुग्न सकिन्छ । दोस्रो, नेपालगन्जदेखि ४० मिनेटको हवाई यात्रापश्चात् ताल्चा विमानस्थलमा अवतरण गरी दुई घन्टाको पैदल यात्राबाट रारा पुग्न सकिन्छ ।
खच्चरबाट सामान ओसार्दै स्थानीय
मुर्मा टप
रारामा घोडा चर्दै
मुर्मा टपबाट देखिएका हिमाल
रारा ताल
मुर्मा टपबाट रारा नियाल्दै आन्तरिक पर्यटक
मुर्मा गाउँ
मुर्मा टपमा रमाउँदै आन्तरिक पर्यटक