दसैँ नजिकिएसँगै उपत्यकाबाट घर फर्कने सर्वसाधारणको लर्को दिनहुँ बढिरहेको छ । २२ असोजयता मात्रै काठमाडौंबाट करिब दुई लाखजना बाहिरिसकेका छन् ।
उपत्यका ट्राफिक कार्यालयको तथ्यांकअनुसार सोमबार साँझसम्म करिब दुई लाखले उपत्यका छाडेका छन् ।
घटस्थापनायता दैनिक ५० हजारका दरले उपत्यका छाडिरहेका छन् । २२ असोजयता सोमबारसम्म एक लाख ९० हजारले उपत्यका छाडेका छन् । अन्य समयमा दैनिक करिब १० हजारसम्मले उपत्यका छाड्ने गरेकोमा चाडपर्व सुरु भएपछि बाहिरिने दर बढेको हो ।
यसबाहेक हवाईमार्गबाट पनि बाहिरिनेको संख्या दैनिक पाँच हजारभन्दा बढी रहेको त्रिभुवन अन्तर्राष्ट्रिय विमानस्थल कार्यालयले जनाएको छ । तर, हवाईमार्गभन्दा सडकमार्गबाट बाहिरिनेको भिडभाड छ ।
मंगलबारदेखि घर फर्किनेहरूको संख्या थप भिडभाड हुने र सडकहरूमा पनि सवारीसाधनको ओहोरदोहोर बढी हुने ट्राफिक कार्यालयले जनाएको छ । ट्राफिक कार्यालय प्रमुख डिआइजी पोषराज पोखरेलले उपत्यकाबाट बाहिरिनेको चाप बढेको बताए । उनका अनुसार घटस्थापनादेखि नै अधिकांश विद्यालय, कलेज र संघ–संस्था बन्द भएपछि दसैँ मनाउन थातथलो फर्कन थालेका हुन् ।
ट्राफिक प्रहरीले उपत्यकाबाट बाहिरिने चारवटै नाकामा यात्रु सहायता कक्ष र चेकजाँचमा कडाइ गरेको छ । यात्रुको सहजताका लागि काठमाडौं उपत्यकाभित्रका १५ स्थानमा यात्रु सहायता कक्ष सञ्चालन गरिएको छ । हाल काठमाडौंबाट बस छुट्ने स्थान गोंगबु क्षेत्रमा सबैभन्दा बढी यात्रुको भिडभाड हुने गरेको छ । ट्राफिकको तथ्यांकअनुसार विभिन्न रुटमा गरी हालसम्म ८७ हजारभन्दा बढीले अग्रिम बुकिङ गरिसकेका छन् ।
तर, सडक भने अस्तव्यस्त
सरकारले दसैँभरका लागि सार्वजनिक सवारीसाधनको रुट परमिट खुला गरिसकेको छ । नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले अहिलेको अवस्था हेर्दा विगतका वर्षभन्दा धेरै यात्रु बाहिरिने जानकारी दिए ।
तर, सडक अस्तव्यस्त हुँदा विगतमा भन्दा यो वर्ष यात्रुहरूले सास्ती खेप्नुपर्ने जानकारी दिए । ‘अहिले देशभरका सडक अस्तव्यस्त छन्, सम्बन्धित निकायले सडक मर्मत–सम्भार नगरिदिएका कारण घर फर्कनेहरूलाई सास्ती पुगेको छ,’ उनले भने, ‘सबैभन्दा बिजोग त नारायणघाट–बुटवलसम्मको सडक छ, यो सडक मर्मत गर्नतर्फ सरकारले चासो दिएको छैन ।’