कांग्रेस बागमती प्रदेश संसदीय दलका प्रमुख सचेतक काफ्लेले दिए राजीनामा

बागमती प्रदेश कांग्रेस संसदीय दलका प्रमुख सचेतक कुन्दनराज काफ्लेले मंगलबार बिहान सचेतक पदबाट राजीनामा दिएका छन् । काफ्लेले कांग्रेस बागमती प्रदेश संसदीय दलका नेता बहादुरसिंह लामालाई भेटेर राजीनामा बुझाएका हुन् ।

पार्टीको केन्द्रीय सदस्यसमेत रहेका काफ्ले प्रदेश सभा सदस्यमा दोलखा जिल्लाको प्रदेश सभामा क्षेत्र नम्बर १ को (क) बाट निर्वाचित भएका हुन् । उनलाई कांग्रेस बागमती प्रदेश संसदीय दलले ०७९ माघ २ गते बसेको बैठकले दलको प्रमुख सचेतकमा नियुक्त गरेको थियो ।

संसदीय दलका नेता लामालाई राजीनामापत्र बुझाउँदै गरेको फोटो सामाजिक सञ्जालमा पोस्ट गरेका काफ्लेले दलको प्रमुख सचेतकको भूमिका निर्वाह गर्दा, पार्टी संगठन र दोलखाली जनतालाई समय दिन नसकेको महसुस गरेकाले राजीनामा दिनुपरेको कुरा उल्लेख गरेका छन् । 

‘गतिशील र सबल कांग्रेसले मात्र यो देश र लोकतन्त्रको भविष्य सुनिश्चित हुने सबैमा बोध भएकै कुरा हो । प्रमुख सचेतकको भूमिका निर्वाह गर्दा, पार्टी संगठन र दोलखाली जनसेवामा समय अभाव महसुस गरेको छु । अतः केन्द्रीय सदस्यको रूपमा कांग्रेसमा नवीन ऊर्जा भर्न थप क्रियाशील रहन र दोलखाली जनताको सेवामा थप समर्पित हुन सो पदबाट राजीनामा दिएको छु,’ उनले भनेका छन् ।

माओवादी केन्द्र र कांग्रेसको गठबन्धनबाट उम्मेदवार बनेका काफ्लेले नेकपा एमालेका उम्मेदवार नरबहादुर श्रेष्ठलाई आठ हजार ४२ मतले पराजित गरेका थिए । उनले २२ हजार सात सय ९७ मत ल्याउँदा श्रेष्ठले १४ हजार सात सय ५५ मत ल्याएका थिए ।