साउदी अरेबियाको प्रो लिगमा आबद्ध अल हिलालले २४ वर्षीय फ्रेन्च स्ट्राइकर केलियन एम्बाप्पेलाई भित्र्याउन प्रस्तावित रकम परिमार्जन गरेको छ । यसपटक अल हिलालले एम्बाप्पेलाई अनुबन्ध गर्न २५९ मिलियन पाउन्डको प्रस्ताव राखेको छ । साउदी क्लबले राखेको प्रस्ताव ४३ अर्ब ६५ करोड १७ लाख ६८ हजार ६५० नेपाली रुपैयाँ हुन आउँछ । अघिल्लोपटक एम्बाप्पेलाई १७३ मिलियन पाउन्ड प्रस्ताव राखेको थियो । अल हिलालले फ्रेन्च स्ट्राइकरलाई जसरी पनि भिœयाउने योजनाका साथ रकम बढाएको हो ।
साउदी क्लबले नयाँ प्रस्ताव पठाएपछि एम्बाप्पेआबद्ध पेरिस सेन्ट जर्मेन (पिएसजी) सकारात्मक देखिएको छ । पिएसजीले एम्बाप्पेलाई अल हिलालसँग वार्ता गर्न ‘ग्रिन सिग्नल’ दिएको छ । साउदी क्लबले फ्रेन्च खेलाडीलाई केवल एक वर्षका लागि मात्र सम्झौता गर्नेछ । एम्बाप्पेको मुख्य लक्ष्य नै स्पेनिस क्लब रियल म्याड्रिडमा जानु हो ।
एक सिजन अल हिलालमा बिताएपछि म्याड्रिड जान उनीमाथि कुनै रोक लगाइनेछैन । पिएसजीसँग उनको सम्झौता एक वर्ष बाँकी छ । सम्झौता सकिएपछि उनी फ्री ट्रान्सफरमा म्याड्रिड जान सक्नेछन् । पिएसजी उनलाई फ्री ट्रान्सफरमा अन्य क्लबमा जान दिने पक्षमा छैन । यसै कारण पिएसजीले यसै सिजनमा उनलाई बेच्ने योजना बनाएको हो । एम्बाप्पेलाई बिक्री गरेर पिएसजीले मोटो रकम आर्जन गर्ने मनसाय बनाएको छ ।
एम्बाप्पे सहमत भए यो बिक्री रकम विश्व कीर्तिमानी हुनेछ । सन् २०१७ मा पिएसजीले नेमारलाई बार्सिलोनाबाट विश्व कीर्तिमानी दुई सय मिलियन पाउन्डमा खरिद गरेको थियो । त्यही वर्ष नै पिएसजीले मोनाकोबाट एम्बाप्पेलाई १६६ मिलियन पाउन्डमा अनुबन्ध ग¥यो । पिएसजीसँग सम्झौता नवीकरण नगर्ने घोषणा गरेका एम्बाप्पेलाई फ्रेन्च क्लबले प्री–सिजनअघिको जापान र दक्षिण कोरियाको भ्रमणमा संलग्न गराएको छैन ।
साउदी अरेबियन इनभेस्टमेन्ट फन्डबाट सञ्चालित प्रो लिग क्लब अल हिलालले यो सिजनमा रुबिन नेभिस र कालिदो कौलिबालीजस्ता युरोपका नाम चलेका खेलाडीलाई अनुबन्ध गरिसकेको छ । अर्कोतिर, अल नासेरले पोर्चुगलका क्रिस्टियानो रोनाल्डोलाई १७३ मिलियन युरोमा भित्र्याएको थियो ।