विश्व डिजिटल संस्करण

अफगानिस्तानमा आइएसको उपस्थिति नरहेको दाबी

अफगानिस्तानको कामचलाउ सरकारले देशमा इस्लामिक स्टेट (आइएस) संगठनको उपस्थिति नरहेको दाबी गर्दै त्यस सम्बन्धमा सार्वजनिक विवरण आधारहीन भएकाे बताएको छ। साथै उसले ती विवरणको खण्डन पनि गरेको छ ।

अफगानिस्तानको इस्लामिक इमिरेट्सले कसैलाई अफगानिस्तानको राष्ट्रिय सुरक्षामा खलल पार्ने वा आफ्नो भूमि अरूका विरुद्धमा प्रयोग गर्न नदिने कार्यवाहक सरकारका विदेश मन्त्रालयका प्रवक्ता अब्दुल काहार बल्खीले स्पष्ट गरेका छन् ।

इरानका एक वरिष्ठ कूटनीतिज्ञले आतंकवादी समूह आइएसका कार्यकर्तालाई सिरिया, लिबिया र इराकबाट अफगानिस्तानमा सारिएको दाबी गरेपछि प्रवक्ता काहारको उक्त स्पष्टीकरण आएको हो । ‘हामी इरानी विदेशमन्त्रीले इराक, सिरिया र लिबियाबाट आइएसका नेतालाई अफगानिस्तानमा सारिएको दाबी गर्ने आरोपलाई अस्वीकार गर्दछौँ,’ बल्खीले ट्विट गरेका छन् । 

यसअघि अफगान सुरक्षा बलहरूले आइएससँग सम्बद्ध दर्जनौँ कार्यकर्तालाई मारेको र गिरफ्तार गरेका थिए ।  चरमपन्थी सशस्त्र समूहले राजधानी काबुलमा मस्जिद, होटेल र विदेश मन्त्रालयका कर्मचारीलगायत धेरैजनामाथि भएका घातक हमलाको जिम्मेवारी लिएको थियो ।