मुख्य समाचार प्रिन्ट संस्करण

चिनियाँ सहयोगमा संसद् सचिवालयमा आए आठवटा बिजुली गाडी

चार्जिङ स्टेसनको टुंगो छैन, कसले चढ्ने भन्ने पनि निर्णय हुन बाँकी

उत्तरी छिमेकी चीनले संघीय संसद् सचिवालयलाई आठवटा बिजुली गाडी अनुदानमा उपलब्ध गराएको छ । चीनबाट तीनवटा उच्च प्रविधिको एसयुभी बिजुली गाडी र पाँचवटा ई–६० ह्याचब्याग गाडी प्राप्त भएका छन् । तर, ती गाडीका लागि चाहिने चार्जिङ स्टेसनको केही टुंगो छैन । 

चीन सरकारका प्रतिनिधिले अनुदानबापतको आठवटा गाडी सोमबार संसद् सचिवालयका पदाधिकारीलाई हस्तान्तरण गरेका हुन् । गाडी प्राप्त गर्न संसद् सचिवालयको सवारी महाशाखा प्रमुख सहसचिव सुरजकुमार दुरा रसुवागढी–केरुङ नाका पुगेका थिए । तत्कालीन सभामुख अग्निप्रसाद सापकोटाको निमन्त्रणामा २७–३० भदौसम्म नेपाल भ्रमणमा आएका चिनियाँ जनकंग्रेसका अध्यक्ष ली चान्सुले नेपालको संसद्लाई सहयोग गर्ने घोषणा गरेका थिए । चान्सुले कुनै शीर्षकमा साढे तीन करोडबराबरको सहयोग गर्ने प्रतिबद्धता जनाएपछि संसद् सचिवालयले अध्ययन गरेर सो रकमबराबरको गाडी माग गर्ने निष्कर्ष निकालेको थियो । 

त्यसपछि निर्णय चिनियाँ सरकारलाई पत्राचार गर्दा उसल स्वीकार गरेर अहिले गाडी दिएको सचिवालयको भनाइ छ । ‘पत्राचार स्वीकार गरेपछि विभिन्न माध्यमबाट चिनियाँ पक्षसँग संवाद भइरहेको छ । त्यसैअनुसार १० तारिखमा हामीले रसुवा नाकाबाट गाडी बुझ्यौँ,’ सहसचिव दुराले भने । गाडी लिन सचिवालयको टोली आइतबार रसुवागढी नाका पुगेको थियो । ‘सोमबार हस्तान्तरण भयो, मैले रिसिभ गरो । भन्सार क्लियर गरी लरीमा हालेर मंगलबार दुईवटा बुधबार ६ वटा गाडी काठमाडौं आइपुग्यो,’ उनले भने । दुराका अनुसार चीन सरकारले गाडी व्यवस्थापनको जिम्मा बिवाइडी कम्पनीलाई दिएको थियो । सरकारले जिम्मा दिएको कम्पनीका प्रतिनिधिले नेपाली पक्षलाई गाडी हस्तान्तरण गरेका थिए । 

गाडी प्राप्त भएपछि संसद् सचिवालयले यसको प्रयोग, चार्ज गर्ने तरिका र ठाउँ, सर्भिसिङ सेवाबारे बिवाइडीको नेपाली एजेन्टसँग छलफल गरेको छ । साथै, पहिलोपटक गाडीको पूर्ण चार्ज गरिदिन अनुरोध पनि गरेको छ । नेपाली एजेन्ट कम्पनीले सचिवालयको अनुरोधमा पहिलोपटकका लागि बिजुली गाडी फुल चार्ज गरिदिएको सवारी महाशाखा प्रमुख दुराले बताए । उनका अनुसार चारवटा गाडी फुल चार्ज भई संसद् सचिवालय परिसरमा आइसकेका छन्, बाँकी चार गाडी चार्जिङ स्टेसनमै छन् । आइतबारसम्म नम्बर प्लेट जडान गरिने उनले बताए । गाडीको प्रयोग कसरी गर्ने भन्ने सभामुख र राष्ट्रिय सभा अध्यक्षसँग परामर्श गरेर तय गरिने उनको भनाइ छ । 

सवारी व्यवस्थापन शाखाका अनुसार यसअघि पनि सचिवालयलाई चीनले गाडी सहयोग गरेको छ । तर, पहिलोपटक बिजुली गाडी अनुदानमा आएको हो । सचिवालयलाई भारत र कोरियालगायतले पनि गाडी सहयोग गरेका छन् । हाल सचिवालयसँग चारवटा बस, ८३ वटा जिप र एक सय ११ वटा मोटरसाइकल छन् । संसद् सचिवालयलाई अनुदानमा गाडी प्राप्त भए पनि चलाउन भने संरचनागत र प्राविधिक चुनौती छ । संसद् सचिवालयका सूचना अधिकारी दशरथ धमलाका अनुसार हालसम्म सचिवालयले विद्युतीय गाडी प्रयोगमा ल्याएको छैन ।