पृथ्वी राजमार्गको सत्रसयमा ट्रमा अस्पताल बनाउन माग

तनहुँको आँबुखैरेनी गाउँपालिकाले पृथ्वीराजमार्गको सत्रसयमा ट्रमा अस्पताल बनाउन गण्डकी प्रदेश सरकारसमक्ष माग गरेको छ। 

आँबुखैरेनी गाउँपालिकाका अध्यक्ष शुक्र चुमानको नेतृत्वमा गण्डकी प्रदेश सरकारका सामाजिक विकास तथा स्वास्थ्यमन्त्री सुशीला सिंखडासँगको भेटमा आँबुखैरेनी– १ सत्रसयमा ट्रमा अस्पताल बनाउन माग गरिएको हो। 

पृथ्वीराजमार्गअन्तर्गत यस खण्डमा दुर्घटना भइरहने भएकाले ट्रमा अस्पतालको आवश्यकता खड्किएको चुमानले बताए। अस्पताल निर्माणका लागि पालिकाले प्रदेश सरकारसँग सहकार्य गर्न तयार रहेको उनको भनाइ छ।

गाउँपालिकाले मार्कीचोकमा स्वास्थ्यपरीक्षण, होल्डिङ सेन्टर र आँबुखैरेनी अस्पतालका लागि डायलाइसिस सेवा सञ्चालनका लागि उपकरण माग गरेको छ। 

गाउँपालिकाले वडा नम्बर ३ मा पालिकास्तरीय अस्पताल सञ्चालन गरेको छ। उक्त अस्पतालमा आँखा उपचार केन्द्र सञ्चालन भइसकेको छ भने मिर्गौलापीडितका लागि डायलाइसिस सेवा सञ्चालन गर्ने लक्ष्य राखिएको चुमानले बताए।

मन्त्री सिंखडासमक्ष चिकित्सकको व्यवस्थाका लागि ध्यानाकर्षण गराइएको छ। यस्तै, गाउँपालिकाभित्रका विद्यालयमा विज्ञान प्रयोगशाला, विद्यालय बस, स्वास्थ्य संस्थादेखि संघसंस्था र अस्पतालका लागि औषधि र ल्याब सामग्री व्यवस्थापन गरिदिन माग गरिएको छ।

एक विद्यालय एक नर्स कार्यक्रम थप विद्यालयमा लागू गर्न पनि मन्त्रीको ध्यानाकर्षण गराइएको चुमानले बताए।

मन्त्रालयकै कार्यक्रमअनुसार गाउँपालिका– ३ रामशाह माविमा यो कार्यक्रम सुरु भइसकेको छ। यो कार्यक्रम अन्य विद्यालयमा पनि आवश्यक रहेकाले कार्यक्रम विस्तारका लागि मन्त्रीको ध्यानाकर्षण गराइएको चुमानले बताए।  

यसैगरी आँबुखैरेनी अस्पतालको स्तरोन्नतिका लागि पनि ध्यानाकर्षण गराइएको छ। गाउँपालिकाले हाल १५ शय्यामा अस्पताल सञ्चालन गरिरहेको छ। मन्त्री सिंखडाले उक्त मागहरूमा आफू सकारात्मक रहेकाले आगामी वर्षको बजेटमार्फत सम्बोधन गर्ने प्रतिबद्धता व्यक्त गरे। रासस