- वि.सं २o८o बैशाख १९ मंगलबार
१७ वर्षीय युवा क्रिकेटर गुल्सन झाले पुनः एकपटक महत्वपूर्ण इनिङ खेल्दै नेपाललाई जिततर्फ अग्रसर बनाएका छन् ।
एसिसी प्रिमियर कप क्रिकेट प्रतियोगिताको उपाधि उचाल्न युएईसँग फाइनलमा भिडिरहेको नेपाल गुल्सन र भीम सार्कीको महत्वपूर्ण इनिङमा जिततर्फ अग्रसर बनेको छ ।
एक सय १८ रनको लक्ष्य पछ्याउने क्रममा २२ रनभित्रै महत्वपूर्ण तीन विकेट गुमाएपछि संकटमा परेको नेपाली इनिङलाई गुल्सन झा र भीम सार्कीले इनिङ सम्हाल्दै ५० रनको अर्धशतकीय साझेदारी गरेका छन् ।
गुल्सनले पनि सुदृढ खेल देखाउँदै अर्धशतक पूरा गरेका छन् । उनले चार छक्का प्रहार गरेका छन् । यसअघि विश्वकप क्वालिफायरका लागि अत्यन्त महत्वपूर्ण मानिएको खेलमा पनि गुल्सनले महत्वपूर्ण अर्धशतकीय इनिङ खेलेका थिए ।
ताजा अवस्थामा नेपालले २८ ओभरमा तीन विकेट गुमाएर एक सय रन बनाएको छ ।
गुल्सनले ७५ बलमा ५० रन पूरा गरेका छन् भने भीमले ६६ बलमा ३४ रन बनाएका छन् । भीमले एक इन्डबाट विकेट जोगाएर महत्वपूर्ण साथ दिएका छन् ।
यसअघि नेपालले कुशल भुर्तेललाई एक, आसिफ सेखलाई आठ र कप्तान रोहितकुमार पौडेललाई एक रनमा गुमाएको थियो ।
