पूर्वी नवलपरासीको नारायणी नदीआसपास र सिमसार क्षेत्रका किसानलाई चैते धान लगाउन भ्याइनभ्याई छ । असारअगावै धान भित्र्याइसक्ने गरी लगाइने चैते धान पूर्वी नवलपरासीको गैँडाकोट, देवचुली, कावासोती, मध्यविन्दु र विनयी त्रिवेणीमा हुन्छ ।

चिउरा र भुजा बनाउन अत्यधिक खपत हुने चैते धान पूर्वी नवलपरासीका आठपालिकामध्ये पाँचवटामा बढी लगाइन्छ । नवलपुरमा गत वर्ष १२ सय १० हेक्टरमा धानखेती भएको कृषि विकास कार्यालय नवलपुरको तथ्यांक छ ।

गत वर्ष यहाँ ६ हजार एक सय २३ मेट्रिकटन चैते धान उत्पादन भएको थियो । कृषि ज्ञानकेन्द्र नवलपुरका बागवानी विकास अधिकृत शंकर पौडेलका अनुसार नवलपुरमा यस वर्ष चैते धानखेती गर्ने क्रम पनि बढेको छ भने धान उत्पादन पनि बढ्ने देखिएको छ ।