राजन पौडेल र नवीन श्रेष्ठ पोखरामा जारी तेस्राे संस्करणको रेवान कप टेनिस प्रतियोगिताअन्तर्गत मेन्स सिंगल्सको फाइनलमा प्रवेश गरेका छन् ।

कास्की जिल्ला टेनिस संघको आयोजना तथा रेवान पोखराको मुख्य प्रायोजनमा जारी प्रतियोगिताअन्तर्गत शनिबार सम्पन्न सेमिफाइनलको खेलमा पौडेलले लक्ष्मण तामाङलाई ६–३, ६–२ र श्रेष्ठले अनुजकुमार बाँस्तोलालाई ६–४, ६–४ ले पराजित गर्दै अन्तिम दुईमा आफ्नो स्थान सुरक्षित गरेका हुन् ।

यसैगरी, डबल्सतर्फको सेमिफाइनलमा गोपीबहादुर भट्टराई र सूर्य भुजेलको जोडीले पदम गुरुङ र हुम आलेको जोडीलाई ६–३, ६–२ ले पराजित गर्दा अर्को खेलमा अनुजकुमार बाँस्तोला र नवीन श्रेष्ठको जोडीले लोक गुरुङ र राजन पौडेलको जोडीलाई ६–२, ६–४ को सेटमा पराजित गर्दै फाइनलमा पुगे ।

उपाधि विजेता खेलाडीले नगद रु १० हजार र उपविजेताले नगद पाँच हजारसहित ट्रफी प्राप्त गर्नेछन् ।