सेनेगलका स्टार खेलाडी साडिओ मानेले कतार विश्वकप फुटबल प्रतियोगिता गुमाउने भएका छन् । बुधबार राति बुन्डेस लिगा खेल्ने क्रममा मानेले घुँडाको चोट बोकेका हुन् । बायर्न म्युनिखले वार्डन ब्रेमनलाई ६–१ अन्तरले पराजित गर्दा मानेले खेलको २०औँ मिनेटमा चोट बोकेका थिए । माने विश्वकप सुरु हुन दुई हप्ता पनि बाँकी नरहँदा फिट हुन नसक्ने अनुमान गरिएको छ ।
यससँगै, अफ्रिका कप च्याम्पियन सेनेगललाई ठूलो झट्का लागेको छ । सेनेगलले विश्वकपको समूह चरणमा नेदरल्यान्ड्स, इक्वेडर र आयोजक कतारसँग खेल्नेछ । ‘माने केही हप्ता मैदानबाहिर हुनेछन्,’ सेनेगल प्रशिक्षक अलिओउ सिसेले भने । टोलीकै मुख्य खेलाडी बाहिर रहँदा सेनेगलका प्रशिक्षक सिसेलाई टाउको दुखाइ बनेको छ । प्रशिक्षक सिसे यसै साता विश्वकप खेल्ने खेलाडीको नाम सार्वजनिक गर्दै छन् ।
चाँडै फर्कने विश्वास
यसैबीच, बायर्नका मुख्य प्रशिक्षक जुलियन नागेल्सम्यानले मानेको चोट ठूलो नभएको र एक्स–रे रिपोर्टको प्रतीक्षामा रहेको बताएका छन् । ‘घाउ त्यति गम्भीर छैन, मलाई विश्वास छ माने छिटै मैदानमा फर्कनेछन्,’ जुलियनले भने, ‘खेलपछि मैले उनको अवस्था हेरेको छैन । माने मैदानबाट बाहिरिएपछि नागेल्सम्यानले लिरोए सानेलाई २८औँ मिनेटमा मैदान पठाएका थिए । सेनेगलका लागि मानेले ९३ क्याप जितेका छन् । उनले सेनेगलका लागि ३४ अन्तर्राष्ट्रिय गोल गरेका छन् । मानेको उत्कृष्ट प्रदर्शनमा यसै वर्ष सेनेगलले अफ्रिका कप अफ नेसन्सको उपाधि जितेको थियो । फाइनल खेलमा सेनेगलले इजिप्टलाई पेनाल्टीमा हराएको थियो । प्रतियोगितामा मानेले चार गोल गरेका थिए ।
