मुगुका सांसद मोहन बानियाँले बलात्कार गरेको भन्दै जिल्ला प्रहरी कार्यालय बाँकेमा जाहेरी दिएकी जुम्लाकी एक महिलालाई बानियाँका आफन्तले धम्की दिएका छन् । आफूलाई चौतर्फी धम्की दिने र प्रलोभन देखाउने काम भइरहेको भन्दै आफू असुरक्षित रहेकोे ती महिलाले बताएकी छिन् । ‘जाहेरी दिएको भोलिपल्ट सांसद बानियाँका ज्वाइँले प्रत्यक्ष भेटेर त्यसको भोलिपल्ट बिहानै १० बजे तपाईंको लिएको २५ लाख रुपैयाँ दिन्छौँ । जाहेरी फिर्ता लिनुस् भनेका थिए,’ ती महिलाले भनिन्, ‘मैले जाहेरी दिइसकेँ । म निकै पीडित छु । अब जाहेरी फिर्ता हुँदैन । जे गर्छ कानुनले गर्छ ।’ जाहेरी फिर्ता लिन आग्रह गर्दै मोहन बानियाँकी छोरीले फोन गरेर प्रलोभन देखाएको पनि उनले बताइन् ।
मोहन बानियाँको छोराले जाहेरी दिएको दिनमै उनलाई जाहेरीले कुनै असर नपर्ने भन्दै धम्की दिएका थिए । पीडित महिलाले थपिन्, ‘म जाहेरी बोकेर जिप्रका जाँदै थिएँ । बाँनियाका छोराले मैले जाहेरी दिँदैमा कुनै असर नपर्ने र यस्ता करणी घटना कैयौँ व्यहाेरिसकेकाले जाहेरी दिनुको कुनै तुक नभएको भन्दै धम्की दिए,’ ती महिलाले भनिन्। बानियाँका आफन्तजनले पटकपटक फोन गरेर वा प्रत्यक्ष भेटेर धम्की दिइरहेको ती महिलाले बताइन् ।
पटक–पटक लिएको पैसा फिर्ता गर्न आग्रह गरेपछि सांसद बानियाँले २५ लाख रुपैयाँको चेक काटेका थिए । राष्ट्रिय वाणिज्य बैंकको चेकमा रहेको खातामा पैसा नभएपछि चेक बाउन्स भएको छ । त्यही बाउन्स भएको चेकसमेत बानियाँका आफन्तसहितको टोलीले खोसेको ती महिलाले बताइन् । जाहेरीमा महिलाले सांसद बानियाँले नेपालगन्जस्थित अप्सरा होटेलमा बलात्कार गरेको खुलाएकी छिन् । उनले भनिन्, ‘बानियाँले लिएको रकम फिर्ता गर्ने भन्दै बोलाएर बलात्कार गरे ।’
