नेपाली कांग्रेसका नेता डा. शेखर कोइरालाले नेपाली कांग्रेसको १४औँ महाधिवेशनमा सरकारले सत्ताको दुरुपयोग गरेको आरोप लगाएका छन्। कांग्रेस अधिवेशनका क्रममा रोल्पा, खोटाङ, रसुवा र रुपन्देहीमा मतदान अधिकृतमाथि भएको व्यवहारलाई लिएर उनले यस्तो टिप्पणी गरेका हुन्।
‘नेपाली कांग्रेसको जारी अधिवेशनमा रोल्पा, खोटाङ, रसुवा र रुपन्देहीमा प्रहरी–प्रशासनको नांगाे हस्तक्षेप र अमर्यादित क्रियाकलाप देखियो। कांग्रेस पार्टीको आन्तरिक लोकतान्त्रिक अभ्यासमा गृह प्रशासनको काम शान्तिसुरक्षा दिने मात्रै हो,’ उनले सामाजिक सञ्जालमार्फत भनेका छन्।
उनले जिल्लाहरूमा खटिएका निर्वाचन अधिकृतहरूलाई धम्क्याउने, तर्साउने र प्रहरीले बीचबाटोबाट पक्राउ गरेको भन्दै यसप्रति प्रशासनको ध्यानाकर्षण गराएका छन्। उनले पार्टीको आन्तरिक र सांगठनिक क्रियाकलापमा कुनै पनि दखल नदिन र हस्तक्षेप नगर्न प्रहरी–प्रशासनलाई अनुरोधसमेत गरेका छन्। ‘वर्तमान सरकारले सत्ताको चरम दुरुपयोग गरेर जिल्लाहरूमा खटिएका निर्वाचन अधिकृतहरूलाई धम्क्याउने, तर्साउने र प्रहरीले बीचबाटोबाट पक्राउ गर्ने कार्यको म भर्त्सना गर्दछु,’ उनले भनेका छन्।
