नेकपा एमाले सुदूरपश्चिम प्रदेश संसदीय दलले मुख्यमन्त्री त्रिलोचन भट्टलाई विश्वासको मत दिने निर्णय गरेको छ । नेकपा एमालको विवाद संसद्मा पनि देखिन थालेकाले मुख्यमन्त्री भट्टले विश्वासको मत लिन लागेका हुन् । उनले विश्वासको मतको प्रयोजनका लागि संसद् सचिवालयमा आइतबार पत्र दर्ता गराएका थिए ।
मंगलबार बिहान बसेको संसदीय दलको बैठकले मुख्यमन्त्रीको पक्षमा मतदान गर्न ह्विप जारी गर्ने निर्णय गरेको एमाले संसदीय दलको प्रमुख सचेतक दुर्गाकुमारी कामीले जानकारी दिइन् ।
यसैगरी, मुख्यमन्त्रीले विश्वासको मत नपाउने अवस्था आएमा कांग्रेसले विश्वासको मतको पक्षमा मतदान गर्ने निर्णय गरेको छ । विश्वासको मत पाउने अवस्था आएमा कांग्रेस तटस्थ बस्ने निर्णय भएको कांग्रेस संसदीय दलका सचेतक टेकबहादुर रैकाले जानकारी दिए ।
हाल ५२ सदस्य रहेको प्रदेश सभामा सरकार गठनका लागि २७ सांसदको मत आवश्यक पर्छ । एमालेका २४ सांसदमध्ये आफ्नो पक्षमा कम्तीमा १५ जना रहेको खनाल–नेपाल पक्षको दाबी छ । माओवादीका १३ सांसद छन् ।
माओवादी संसदीय दलका सचेतक अक्कल रावलले एमाले संसदीय दलले सरकारलाई समर्थन कायम राख्ने निर्णय गरिसकेकाले मुख्यमन्त्रीले विश्वासको मत पाउने दाबी गरे । केही समयपछि प्रदेश सभाको बैठक सुरु हुँदै छ । बैठकमा विश्वासको मतबारेमा छलफल हुनेछ ।
