नेपाल कम्युनिस्ट पार्टी (नेकपा) का वरिष्ठ नेता तथा पूर्वप्रधानमन्त्री झलनाथ खनालले प्रधानमन्त्री केपी ओलीले देशमा अराजकता मच्चाएको बताएका छन् । अखिल नेपाल महिला संघले बुधबार काठमाडौंमा आयोजना गरेको अगुवा कार्यकर्ता भेला तथा प्रशिक्षण कार्यक्रमलाई सम्बोधन गर्दै खनालले प्रधानमन्त्री ओलीले केही मान्छेहरूलाई बालुवाटारमा भेला गरेर अराजकता मच्चाएको बताएका हुन् ।
बालुवाटारमा संविधानविरोधी, लोकतन्त्रविरोधी र अराजक मान्छेहरूलाई मात्रै भेला हुने गरेको र त्यसको नायक प्रधानमन्त्री ओली नै रहेको खनालको दाबी छ । उनले भने, ‘केपी ओलीले केही मान्छेहरूलाई पालेर जसरी बालुवाटारमा भेला गरेका छन् त्यो एउटा गुटको भेला हो । संविधानविरोधी, लोकतन्त्रविरोधी, अराजक, मुलुकलाई लुटपाट गरेर खाने मान्छेहरूको भेला हो । त्यसको नायक अहिले केपी ओली बन्न पुगेका छन् ।’
आफैँले हस्ताक्षर गरी निर्माण गरेको संविधानमाथि प्रधानमन्त्री ओलीले बलात्कार गरेकोसमेत वरिष्ठ नेता खनालले बताए । संविधानमा नभएको व्यवस्था प्रयोग गरी प्रतिनिधिसभा विघटन गरिनु संविधान नै विघटन गरेको हुने उनको भनाइ छ ।
उनले भने, ‘संविधान निर्माण गरिसकेपछि उनले पनि हस्ताक्षर गरेका छन्, तर आज आफ्नै हस्ताक्षरलाई उनले बलात्कार गरेका छन् । देशमाथि आक्रमण गरेका छन् र संविधानको मर्म र भावनाविपरीत उनले अहिले फेरि प्रतिनिधिसभा विघटन गरेका छन् । प्रतिनिधिसभाको विघटन भनेको संविधानको विघटन हो । संविधानलाई प्वाल पार्ने काम हो । संविधानलाई विध्वंस गर्ने काम हो ।’
देशमा भएको अस्थिरतालाई समाप्त गरी स्थिरता आएको अवस्थामा फेरि प्रधानमन्त्री ओलीले देशलाई अस्थिरतातर्फ धकेलिदिएको उनको जिकिर छ । एकपटक प्रतिनिभिसभा विघटन गरेपछि फेरि चुनाव भए पनि अब बन्ने प्रधानमन्त्रीले समेत संसद् विघटन गर्न सक्ने अधिकार राख्ने उनले बताए ।
एकपटकको नजिरमा टेकेर फेरि पनि यस्ता कदम आउने भएकाले प्रतिनिधिसभा पुनर्स्थापनाको विकल्प नभएको उनको तर्क छ । उनले भने, ‘अब मानिलिउँ वैशाखमा चुनाव भयो, कुनै पनि वेलामा चुनाव भयो, सरकार बन्यो भने पनि कुनै पनि प्रधानमन्त्रीले यो संसद् कुनै पनि वेलामा विघटन गर्न सक्छन् । अब यो नजिर हुन्छ । यदि यसलाई नजिरको रूपमा स्थापना गर्ने हो भने हाम्रो मुलुक जसरी विगत ५०/६०/७० वर्षसम्म अस्थिरताको सिकार भयो फेरि त्यही दिशातर्फ अगाडि बढ्छ ।’
राजनीतिक दलसम्बन्धी ऐनको धारा ३३ अनुसार कुनै पनि दुई पार्टी मिलेर बनेको एकीकृत पार्टीलाई पाँच वर्षसम्म फुटाउन नमिल्ने उनले बताए । तर, फुटाउनै पर्ने परिस्थिति भए पनि संसदीय दलमा र केन्द्रीय समितिमा ४०/४० प्रतिशत हुनैपर्ने उनले बताए ।
अहिलेको नेकपामा ४० प्रतिशत पनि ओलीसँग नरहेकाले पार्टी फुटाउनै नसक्ने पनि उनले जिकिर गरे । नेपालको कम्युनिस्ट आन्दोलनमा कहिले उग्रवामपन्थी र कहिले दक्षिण वामपन्थी भडकाउहरू हाबी भएको उल्लेख गर्दै उनले अहिलेका ओली पनि दक्षिणपन्थी भडकाउ भएको बताए ।
प्रधानमन्त्री ओलीले सत्तामा पुग्न पार्टीलाई भऱ्याङ मात्रै बनाएको आरोप उनको छ ।
राजा महेन्द्रले देशमा विभिन्न उद्योगधन्दाहरू निर्माण गरी समाजवादसँग मिल्दो काम गरेको, तर समाजवादको नारा बोकेर हिँडेको कम्युनिस्ट पार्टीका नेता ओलीले प्रधानमन्त्री भएपछि केही पनि काम गर्न नसकेको उनले बताए । प्रधानमन्त्री ओलीले कामभन्दा धेरै गफ गरेकोसमेत बताए । उनले भने, ‘धेरै गफ गर्ने, उखानटुक्काहरू हाल्ने, मान्छेहरूलाई लिने, घरघरमा ग्यास चुलाे ल्याइदिन्छु भन्ने, खै कहाँ आयो ग्यास चुलाे । त्यही बालुवाटारमा पनि छ कि छैन ग्यास चुलाे । ग्यासपाइप ।’
प्रधानमन्त्री ओलीका कारण नेपालको कम्युनिस्ट आन्दोलन नै लज्जित भएको पनि खनालले बताए । ओली कम्युनिस्ट आन्दोलका सबैभन्दा कलंकित पात्र भएको उनको दाबी छ ।
