नेकपा प्रचण्ड–नेपाल समूहका अध्यक्ष माधवकुमार नेपालले निरंकुश ढंगबाट अघि बढेका प्रधानमन्त्री केपी ओलीको समय सकिएको बताएका छन् ।
नेकपा प्रचण्ड–नेपाल समूहले प्रधानमन्त्रीको संसद् विघटन गर्ने कदमविरुद्ध आज आयोजना गरेको काठमाडौंको सभालाई सम्बोधन गर्दै उनले प्रधानमन्त्री ओली पहिलेदेखि नै गणतन्त्रविरोधी रहेको बताए ।
उनले गणतन्त्र स्थापना गर्ने विषयमा छलफल हुँदा नेता ओलीले ‘बलयगाडा चढेर वासिङ्टन नपुग्ने’ बताएको भन्दै उनले देशमा गणतन्त्र नचाहेको सुनाए ।
प्रधानमन्त्री ओली अलोकतान्त्रिक तरिकाले आफ्नो अभीष्ट पूरा गर्न अघि बढेको अध्यक्ष नेपालकाे ठहर छ ।
उनले नेपाली कांग्रेसलगायत सबैले यो कदमलाई असंवैधानिक कदम भनेर आन्दोलन घोषणा गरिसकेकाले यो कदम उल्टने बताए ।
अध्यक्ष नेपालले पार्टीको सल्लाहभन्दा स्वेच्छाचारी ढंगबाट अघि बढेको बताए । उनले प्रधानमन्त्री ओलीमा कम्युनिस्टमा हुनुपर्ने गुण र लोकतन्त्रवादीमा हुनुपर्ने गुणहरू नभएको बताए ।
उनले पार्टीको निर्देशन उल्लंघन गरेकाले उनीमाथि कारबाही भएको बताए । अझै पनि ओलीलाई सुध्रिने आशामा केन्द्रीय कमिटी सदस्यका रूपमा भने राखिराखेको बताए ।
तर, बालुवा पेलेर तेल ननिस्कने उनले बताए । साथै उनले बांगाे पुच्छरलाई सोझो पनि बनाउन नसक्ने बताए । तर, आशा भने नछोडेको अध्यक्ष नेपालको भनाइ छ ।
