प्रधानमन्त्री केपी ओलीले वामपन्थी नेता बोमबहादुर खड्काको निधनप्रति दुःख व्यक्त गरेका छन् । ओलीले विज्ञप्ति जारी गर्दै खड्काको निधनबाट पार्टी, जनता र राष्ट्रका लागि अपूरणीय क्षति भएको बताएका हुन् ।
खड्काप्रति श्रद्धाञ्जली व्यक्त गर्दै ओलीले शोकसन्तप्त परिवारजनमा समवेदना प्रकट गरेका छन् । ओलीले भनेका छन्– गुल्मीमा उहाँले नटेकेको कुनै बाटो छैन होला, उहाँले नभेटेको कुनै व्यक्ति छैन होला ।
खड्काले लुम्बिनी विशेषतः गुल्मीको कम्युनिस्ट आन्दोलनमा अत्यन्त महत्वपूर्ण र अविस्मरणीय योगदान पुऱ्याएको ओलीले स्मरण गरेका छन् । सिद्धान्तप्रतिको निष्ठा, उन्नत राजनीतिक चेतना, पार्टी, जनता र राष्ट्रप्रतिको निःस्वार्थ एवं असीमित समर्पण खड्काका विशेषता रहेको ओलीको बुझाइ छ ।
प्रधानमन्त्री ओलीले नेता खड्काका योगदान चिरकालसम्म स्मरणीय र भावी पुस्ताका लागि प्रेरणाको स्रोत रहने पनि उल्लेख गरेका छन् ।
