सत्तारुढ दल नेपाल कम्युनिस्ट पार्टी (नेकपा)काे निकै पेचिलो बनेको सचिवालय बैठक बोलाउने विषय अन्ततः पार्टीका दुवै अध्यक्षद्वय केपी ओली र पुष्पकमल दाहाल प्रचण्ड आ–आफ्नो अडानबाट पछि हटेपछि टुंगो लागेको छ ।
महासचिव विष्णु पौडेलले दुवै अध्यक्षसँग परामर्श गरी भोलि शुक्रबार अपराह्न ४ बजेका लागि सचिवालय बैठक डाकेका छन् । सचिवालय बैठक बोलाउन दुवै अध्यक्ष सहमत देखिएका छन् ।
दुई सातादेखि अध्यक्ष दाहाल अन्य वरिष्ठ नेताहरूको साथमा सचिवालय बैठक डाक्न माग गर्दै आएका थिए ।
अध्यक्ष ओलीले पहिला एजेन्डामा सहमति भएपछि मात्र बैठक बस्ने अडान लिएका थिए । उनले पार्टी विधानअनुसार दुवै अध्यक्षको सहमतिमा बैठक डाक्ने व्यवस्था भएको र त्यसका लागि पहिला एजेन्डामा सहमति हुनुपर्ने अडान राख्दै आएका थिए । हाल उनी यस अडानबाट पछि हेटेको देखिएको छ ।
त्यसैगरी अर्का अध्यक्ष दाहाल पहिला बैठक बोलाउने र सबै एजेन्डा बैठकमा नै राखौँ भन्दै अडानमा थिए । उनले बिहीबार अपराह्न ४ बजेका लागि सचिवालयको अनौपचारिक बैठक डाकेका थिए ।
दाहाल पनि हालका लागि आफ्नो अडानबाट पछि हटेका छन् । दुवै अध्यक्ष केही लचक भएपछि महासचिव पौडेलले बैठक डाकेका हुन् ।
यसअघि यही २१ कात्तिकमा दाहालले धुम्बाराहीमा सचिवालयको अनौपचारिक बैठक डाकेका थिए । जसमा दाहालसहित वरिष्ठ नेताहरू माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठ गरी पाँचजना सहभागी थिए ।
उक्त बैठकपछि २२ कात्तिकमा सचिवालय बैठक डाक्न भन्दै अध्यक्ष ओलीलाई लिखित माग बुझाइएको थियो ।
त्यसपछि दाेस्रोपटक अध्यक्ष दाहालको आह्वानमा पार्टी कार्यालय धुम्बाराहीमा सचिवालयको अनौपचारिक बैठक बसेको थियो । जसमा पाँचजना सदस्य सहभागी थिए ।
त्यसपछि दाहालले आज बिहीबार अपराह्न ४ बजे सचिवालयको अनौपचारिक बैठक बोलाएका थिए ।
नेकपामा पछिल्लो दुई हप्तायता दाहाल पक्षले सचिवालय बैठक बोलाउन माग गर्ने र ओली पक्ष एजेन्डामा सहमति गरेपछि मात्र बोलाउने भन्दै तानातान भएको थियो ।
जसले गर्दा नेकपाको अन्तर्संघर्ष उत्कर्षमा पुगेको देखिन्थ्याे ।
सचिवालय बैठक बोलाइएपछि बैठकमा के–कस्ता गतिविधि हुने हो भन्ने अहिले चासो देखिएको छ ।
