पोखरामा पनि प्लाज्मा थेरापी विधिबाट कोरोना संक्रमितको उपचार प्रक्रिया अगाडि बढाइने भएको छ । पोखरा स्वास्थ्य विज्ञान प्रतिष्ठानले प्लाज्मा थेरापीबाट संक्रमितको उपचार प्रक्रिया अगाडि बढाएको हो । यसका लागि कोरोना संक्रमण निको भएका र दुई साता ननाघेकालाई रक्तदान गर्न प्रतिष्ठानले आह्वान गरेको छ ।
रगत प्राप्त हुनासाथ प्लाज्मा थेरापी विधिबाट उपचार थाल्ने प्रतिष्ठानका निर्देशक डा. अर्जुन आचार्यले जानकारी दिए । ‘अब हामीले पनि प्लाज्मा थेरापीबाट उपचार थालनी गर्दै छौँ । यसका लागि सबै प्रक्रिया पूरा भएका छन् । मात्र अब रगतको प्रतीक्षामा छौँ । कोरोना संक्रमित भई निको भएको दुई साता ननाघेकाले रक्तदान गर्न सक्नुहुन्छ,’ उनले भने ।
रक्तदान गर्न चाहनेलाई क्षेत्रीय रक्त सञ्चार सेवामा आएर दिने प्रबन्ध मिलाइएको पश्चिमाञ्चल क्षेत्रीय अस्पतालका डा. बुद्धिसागर लामिछानेले जानकारी दिए ।
रेम्डेसिभर औषधि पनि चलाउने तयारी
पोखरा स्वास्थ्य विज्ञान प्रतिष्ठानअन्तर्गत रहेको पश्चिमाञ्चल क्षेत्रीय अस्पतालको कोभिड उपचार केन्द्रमा संक्रमणका कारण गम्भीर बिरामी परेकालाई रेम्डेसिभर औषधि दिने तयारी भएको छ ।
औषधि ल्याउने प्रक्रिया पूरा भएको र छिट्टै औषधि आउने प्रतिष्ठानका निर्देशक डा. आचार्यले जानकारी दिए । सो औषधि आउनासाथ चलाउने तयारी भएको उनले बताए । ‘हामी अब कोरोना संक्रमणबाट गम्भीर बिरामीलाई रेम्डेसिभर औषधि दिने तयारीमा छौँ । आजै वा भोलिसम्ममा औषधि आइपुग्ने जानकारी प्राप्त भएको छ । आउनासाथ त्यो औषधि पनि सुरु गर्ने तयारीमा छौँ,’ उनले भने ।
