सिन्धुपाल्चोक । तातोपानी र रसुवागढी नाका बन्द भएपछि मुस्ताङको कोरोला नाकामा पुगेका कन्टेनर व्यवसायी विभिन्न समस्यामा परेका छन्।
लोमान्थाङको नेचुङमा रहेको मुस्ताङ भन्सारबाट पारिपट्टि चिनियाँ भन्सार क्षेत्र लिचीमा मुस्ताङबाहेक अन्य जिल्लाका नागरिकलाई प्रवेश गर्न नदिइँदा मालवाहक कन्टेनरका चालकलाई समस्या भएको छ। कन्टेनर लिएर लिची जान मुस्ताङका चालक वा चिनियाँ नागरिक नै आवश्यक पर्ने अवस्था छ। आफ्नै कन्टेनर आफैँले चलाउन नपाउँदा व्यवसायी मर्कामा परेका छन्।
यो त सामान्य समस्या मात्रै हो। मुख्य समस्या भनेको लिची पुगेका कन्टेनरलाई ३६ घण्टासम्म इन्जिन चालू राख्नुपर्ने बाध्यता हो। इन्जिन बन्द गरे गाडी उतै थन्किने अवस्था रहेको नेपाल ट्रक कन्टेनर ढुवानी सेवा लिमिटेडका अध्यक्ष अर्जुनबहादुर सापकोटाले जानकारी दिए। उनका अनुसार हालसम्म एक दर्जन कन्टेनरका इन्जिन बन्द भएपछि ती लिचीमै अलपत्र परेका छन्।
कन्टेनर व्यवसायीका गुनासा सुन्न मुस्ताङ पुगेका सापकोटाले कोरोला नाकामा चिनियाँ पक्षले मालवाहक कन्टेनरलाई मुस्ताङ भन्सार यार्डसम्म ल्याउन दिनुपर्ने माग गरे। ‘नेपाली कन्टेनर पारिपट्टि लिचीमा लैजाने हो भने नेपाली पक्षले धेरै समस्या झेल्नुपर्छ,’ उनले भने।
लिचीको अत्यधिक चिसो मौसमका कारण नेपाली गाडीमा प्रयोग हुने डिजेल जम्ने, ब्याट्रीले काम नगर्ने र रेगुलेटरमा रहेको पानी जम्ने समस्या देखिएको छ। नेपाली कन्टेनरमा प्रयोग हुने डिजेल, ब्याट्री र रेगुलेटर वाटरको गुणस्तर कमजोर भएकाले यस्तो समस्या आएको बताइएको छ। लिची पुगेका नेपाली कन्टेनरलाई त्यहाँका भन्सार क्लियरेन्स एजेन्टले लापरबाहीपूर्वक चलाउँदा धेरै गाडी बिग्रिएका छन्।
धेरै समस्या झेलेर नेचुङ आइपुगेका नेपाली कन्टेनरले कोरोला नाकाबाट कागबेनी, जोमसोम हुँदै म्याग्दीसम्मको खराब सडक पार गर्नुपर्ने अर्को चुनौती छ। कठिन भूगोल र जोखिमपूर्ण सडकका कारण व्यवसायीले ढुवानीका क्रममा थप समस्या झेल्नुपरेको छ।
चाडपर्वलाई लक्षित गरी सामग्री आयात गर्न तीन दिनका लागि खुलेको तातोपानी नाका पुनः बन्द भएको छ। खासा हुँदै आउने विदेशी नागरिकलाई तातोपानी नाकाबाट प्रवेश गर्न दिइए पनि नेपालबाट चीन प्रवेशमा रोक लगाइएको छ। यसले सीमावर्ती क्षेत्रका नागरिकलाई चिन्तित बनाएको छ।
तातोपानी र रसुवागढी नाकामा काम गर्दै आएका कन्टेनर व्यवसायी मुस्ताङ सरेका छन्। त्यस्तै, खासा र केरुङमा काम गर्ने चिनियाँ ट्रान्सपोर्ट कम्पनी पनि लिचीमा स्थानान्तरण भएका छन्।
ल्हासाबाट करिब नौ सय किलोमिटर र लोमान्थाङबाट करिब ४५० किलोमिटर दूरी पार गरेर चिनियाँ सामान काठमाडौं आइपुग्दा ढुवानी लागत बढेको छ। त्यसको असरले सामानको मूल्यसमेत अकासिएको छ। नेपालका लागि ल्याइएका १५० वटा चिनियाँ कन्टेनरमा रहेका मालसामान अहिले लिचीमै रोकिएका छन्।
मुस्ताङमा रहेका कन्टेनर व्यवसायी आखेट प्रकाशका अनुसार नेपाल सरकारले कूटनीतिक पहल गरी भन्सार प्रक्रिया व्यवस्थित गर्न सके कोरोला नाका नियमित रूपमा सञ्चालन हुने अवस्था छ। यसका लागि दुवै देशका भन्सार अधिकारीबिच समन्वय र नेपाली कन्टेनरलाई सहज रूपमा आवतजावत गर्ने व्यवस्था मिलाउन आवश्यक देखिएको छ।
