फ्रेन्चाइज क्लब विराटनगर किंग्सले आफ्नो तल्लो तहको क्रिकेट विकास कार्यक्रमअन्तर्गत ‘ड्रिम टु प्ले’ को दोस्रो संस्करण आयोजना गर्ने भएको छ । १ देखि ५ असोजसम्म हुने कार्यक्रम कोशी प्रदेश क्रिकेट संघअन्तर्गत रहेका पाँच जिल्लामा हुनेछ ।
यस आयोजनामार्फत विभिन्न जिल्लामा रहेका प्रतिभाशाली खेलाडीलाई एउटै प्लाटफर्ममा ल्याई आफ्नो क्षमता प्रदर्शन गर्ने अवसर प्रदान गरिने विराटनगर किंग्सका निर्देशक दीपेन्द्र चौधरीले जानकारी गराएका छन् । ‘यो कार्यक्रम नेपाली क्रिकेट विकासमा तल्लो तहदेखि नै प्रतिभाको पहिचान, अवसर प्रदान गर्न र उचित मार्गदर्शन गर्न अत्यन्त महत्वपूर्ण रहेको छ,’ निर्देशक दीपेन्द्रले भने ।
टिम व्यवस्थापक विजयकुमार धितालले ड्रिम टु प्ले कार्यक्रम केवल एउटा क्रिकेट प्रतियोगिता मात्र नभई युवा प्रतिभाको खोजी, विकास र भविष्य निर्माण गर्ने अभियान रहेको जनाए । ‘विराटनगर किंग्सले दोस्रोपटक आयोजना गर्न लागेको यस कार्यक्रमले कोशी प्रदेशमा क्रिकेटको आधार तहलाई अझ मजबुत बनाउने विश्वास गरिएको छ,’ व्यवस्थापक घितालले भने । यो प्रतियोगितासँगै विराटनगरले आफ्नो आइकोनिक खेलाडीसमेत छनोट गर्नेछ ।
निर्देशक चौधरीले भने, ‘हरेक प्रतिभाको एउटा सपना हुन्छ, तर त्यो सपनालाई वास्तविकतामा बदल्न सही अवसर आवश्यक छ । ड्रिम टु प्ले त्यही अवसर सिर्जना गर्ने एउटा महत्वपूर्ण कदम हो ।’
