चुनाव समीक्षा तथा पार्टी पुनर्गठन कार्यदलमा आएका दुई समानान्तर प्रतिवेदन मिलाएर एउटै प्रतिवेदन बनाउने तयारीका लागि एमालेले शनिबारबाट आवासीय छलफल थालेको छ । उपाध्यक्ष तथा कार्यदल संयोजक रामबहादुर थापा बादल र महासचिव शंकर पोखरेलको अलग–अलग प्रतिवेदनलाई एकीकृत रूप दिन १५ सदस्यीय कार्यदलमा रहेका नेताहरू काभ्रेको पनौती पुगेका छन् । पनौतीस्थित एक होटेलमा आवासीय छलफल गरेर सोमबारभित्र प्रतिवेदनलाई अन्तिम रूप दिने कार्यदलको सहमति छ ।
प्रचार विभाग प्रमुख नीरज आचार्यले प्रतिवेदन तयारीका लागि शनिबारबाट आवासीय छलफल सुरु भएको जानकारी दिँदै सोमबारभित्र पार्टी हितलाई केन्द्रविन्दुमा राखेर कार्यदलले प्रतिवेदन तयार पार्ने र त्यसपछि सचिवालय हुँदै केन्द्रीय कमिटी बैठकमा छलफलका लागि प्रस्तुत हुने जानकारी दिए । ‘नेताहरूले सोमबारभित्र प्रतिवेदन बनाइसकेर फर्किनुहुन्छ,’ आचार्यले भने, ‘पार्टी हितलाई केन्द्रविन्दुमा राखेर प्रतिवेदन बन्नेछ ।’
केन्द्रीय कार्यालय, च्यासलमा शुक्रबार बसेको बैठकले शनिबारदेखि लगातार आवासीय छलफल गरेर दुवै दस्तावेज अध्ययन गर्ने र सहमतिका आधारमा एउटै प्रतिवेदन तयार गर्ने निर्णय गरेको थियो । कार्यदलबाट पारित प्रतिवेदन केन्द्रीय सचिवालय बैठक हुँदै आगामी ५ देखि ७ असोजका लागि बोलाइएको केन्द्रीय कमिटी बैठकमा छलफलका लागि प्रस्तुत गर्ने तयारी छ ।
शुक्रबारको कार्यदल बैठकमा उपाध्यक्ष विष्णु पौडेलसहितका केही नेताले अर्का उपाध्यक्ष थापाको कार्यशैलीमाथि खुलेर आलोचना गरेका थिए । कार्यदलका संयोजकसमेत रहेका थापाले महासचिव पोखरेललाई ‘काउन्टर’ दिँदै अलग प्रतिवेदन बनाएर पेस गरेपछि नेताहरू उनीप्रति आक्रोशित भएका थिए ।
आलोचना गर्ने नेताहरूले केन्द्रीय सचिवालय र यसअघिको कार्यदल बैठकको निर्णयविपरीत थापाको प्रतिवेदन आएको बताएका थिए । १५ सदस्यीय कार्यदलमा पार्टी पुनर्गठनका क्रममा अध्यक्ष केपी ओलीलाई हटाउनुपर्ने र हटाउन नहुने दुवै मत राख्ने नेता रहे पनि थापाले पार्टीको निर्णयको मर्म नै नबुझेको भन्दै आलोचना भइरहेको छ ।
